Erdoʻgʻanni haqorat qilganlikda ayblanib hukm qilingan stendap qiziqchisi ozodlikka chiqish arafasida
Turkiyalik komediyachi Deniz Goʻktash qariyb 19 oylik qamoq jazosiga hukm qilindi, biroq jazo muddatini oʻtab boʻlgani sababli ozod etilishi kutilmoqda.
Erdoʻgʻanni haqorat qilganlikda ayblanib hukm qilingan stendap komik ozodlikka chiqishi kutilmoqda
Dushanba kuni Istanbul sudi binosi oldida toʻplangan qiziqchining tarafdorlari qoʻllarida «Deniz Goʻktash yolgʻiz emas» deb yozilgan plakatlarni ushlab turishdi.
Istanbul sudi taniqli qiziqchini Prezident Rejep Tayyip Erdoʻgʻanni haqorat qilganlikda aybdor deb topdi va uni qariyb 19 oylik qamoq jazosiga hukm qildi, biroq jazo muddatining bir qismini oʻtab boʻlgani sababli uni ozod qilish haqida buyruq berdi.
Shuningdek, unga nisbatan Turkiyani tark etishni taqiqlovchi sayohat taqiqi joriy etildi.
Endilikda ish yakuniy qaror qabul qilinishi uchun apellyatsiya sudiga yuboriladi.
Ayblovlarni rad etgan Deniz Goʻktash allaqachon panjara ortida qariyb 90 kun oʻtkazdi. Prokurorlar unga 12 yilgacha qamoq jazosi berishni soʻrashgan edi. Uning ishi Turkiyadagi hibsga olishlar toʻlqini fonida yuz bermoqda, inson huquqlari tashkilotlari buni muxolif fikrlarni bostirishga qaratilgan deb hisoblaydi.
Uning stendap chiqishi YouTube'da keng tarqalib, 15 milliondan ortiq koʻrilgan.
Prokurorlar qiziqchining Turkiya rahbarini «uyatchan diktator» deb taʼriflagan bir jumlasiga eʼtibor qaratishdi, biroq Goʻktash aytgan gaplarida «hech qanday jinoiy unsur» yoʻqligini taʼkidladi.
«Diktator — haqorat emas», dedi u. «Bu siyosiy taʼrifdir».
Ammo Turkiyada prezidentning koʻngliga tegish hazil qilinadigan narsa emas. Goʻktash iyul oyida taʼtildan qaytganida Istanbul aeroportida hibsga olinib, qoʻliga kishan solingan edi.
Dushanba kungi sud majlisida uning bir kishilik kamerada oʻtkazgan 88 kun davomida hazil tuygʻusini yoʻqotmagani yaqqol koʻrinib turdi.
«Hayotimdan uch oy tortib olindi», dedi u minbardan turib. «Ammo men chekishni tashladim, shuning uchun hayotimga yana uch oy qoʻshaman». Bu gap sud zalida kulgi va baland qarsaklarga sabab boʻldi.
Tashqarida esa uning hamkasbi Firat Aksal kabi tarafdorlari hukmdan yoqimli hayratda qolishdi.
«Quvonchimizdan nima qilishni ham bilmayapmiz», dedi u. «Biz juda xursandmiz. Toʻgʻrisini aytsam, adolatli sud boʻlishidan umidimiz yoʻq edi».
Uning aytishicha, Goʻktash endi bir necha kun dam oladi, oilasini koʻradi va keyin sahnaga qaytadi.
Qiziqchi yaqin soatlarda ozod qilinishi kutilmoqda, biroq koʻplab boshqa shaxslar, jumladan jurnalistlar, huquq himoyachilari, namoyishchi talabalar, LGBTQ faollari va Istanbulning saylangan meri Ekrem Imamoglu hamon qamoqda qolmoqda. Bu kunlarda Turkiyada qamoqxonalar toʻlib-toshgan.