El Nino sabab Peruning 893 ta tumanida favqulodda holat e’lon qilindi
El Nino tufayli Peru 893 ta tumanida favqulodda holat e’lon qildi.
Peru hukumati El Nino hodisasi sababli yuzaga kelishi mumkin bo‘lgan kuchli yomg‘irlar va suv toshqinlari xavfi tufayli mamlakatning 23 ta hududidagi 893 ta tumanida 1-sentyabrdan boshlab favqulodda holat rejimini joriy etdi.
Ma’lum qilinishicha, favqulodda holat rejimi 60 kun davomida amal qiladi. Davlat idoralari va mahalliy hokimiyat organlariga kuchli yog‘ingarchiliklar natijasida yuzaga kelishi mumkin bo‘lgan ko‘chkilar, toshqinlar va suv bosish xavfining oldini olish uchun zudlik bilan choralar ko‘rish majburiyati yuklatildi.
Rasmiylar mahalliy infratuzilmani mustahkamlash, evakuatsiya yo‘nalishlarini tayyorlash hamda juda yuqori xavf zonasiga kiritilgan hududlarda gumanitar yordam zaxiralarini yaratishga chaqirdi. Peru prezidenti Keyko Fuhimori tahdid miqyosi mahalliy va hududiy hokimiyat organlarining imkoniyatlaridan ortiq ekanini ta’kidladi.
Prognozlarga ko‘ra, 2026-yil sentyabridan 2027-yil yanvarigacha bo‘lgan davrda Peru hududida El Nino hodisasi katta ehtimol bilan o‘ta yuqori darajaga yetishi kutilmoqda.
Peruning ushbu hodisani o‘rganish qo‘mitasi hisobotiga ko‘ra, yaqin oylarda El Nino’ning o‘ta kuchli bo‘lishi ehtimoli taxminan 70 foizni tashkil etmoqda.
El Nino – Tinch okeanining ekvator qismidagi suv haroratining me’yordan ortiq isib ketishiga olib keladigan tabiiy hodisa bo‘lib, u butun dunyo bo‘ylab ob-havo sharoitlariga ta’sir ko‘rsatadi.
Avvalroq El Nino so‘nggi 40 yilda keskin kuchaygani aniqlangani haqida xabar berilgandi. Galapagos orollaridagi marjonlar tahlili Tinch okeanining sharqiy qismida El Nino bilan bog‘liq harorat tebranishlari sanoatlashuvdan oldingi davrga nisbatan 36,5 foizga oshganini ko‘rsatgan.