Dunyo aylanişga çiqqan kema Erondagi uruş tufayli töxtab qoldi
Yölovçilar Kambodjaga tuşirilgan.
Dunyo bo‘ylab sayohatga chiqqan kema Erondagi urush sabab to‘xtab qoldi
Villa Vie Odyssey kruiz kemasi dunyo bo‘ylab safarini to‘xtatdi va yuzlab yo‘lovchilarni Kambodjaga tushirdi. Kema operatori AQShning Eron bilan urushi fonida yoqilg‘i narxi oshgani sababli sayohatni davom ettira olmasligini ma’lum qildi.
27-oktabr kuni layner egasi bo‘lgan Amerikaning Villa Vie Residences kompaniyasi faoliyatini qayta tashkil etishini bildirdi. Yo‘lovchilar uchun sohilda «vaqtincha yashash joylari» qidirilishi boshlangan.
Fevral oyida urush boshlanganidan keyin yoqilg‘i sarfini kamaytirishga harakat qilingan — jumladan, layner tezligini pasaytirish va portlarda to‘xtashlarni ko‘paytirish orqali. Ammo bu choralar narxlar «favqulodda» oshishini qoplashga yordam bermagan. Villa Vie Residences ma’lumotlariga ko‘ra, Osiyoning ayrim hududlarida bir kayuta uchun yoqilg‘i xarajatlari oyiga 1,8 ming dollardan 8 ming dollargacha oshgan. Natijada kompaniya endi qoplay olmaydigan zararlarga duch keldi.
Villa Vie Odyssey — 755 kundan buyon dunyo bo‘ylab sayohatni amalga oshirayotgan layner. Kema 2024-yil oktabrida Shimoliy Irlandiyaning Belfast shahridan yo‘lga chiqqan va o‘tgan vaqt mobaynida dunyoning 147 mamlakatida bo‘lgan. Yo‘lovchilarga dunyo bo‘ylab «uzluksiz» sayohat va’da qilingandi. Ularga bortdagi kayutalarni uzoq muddatga ijaraga olish yoki hatto doimiy yashash uchun 120 mingdan 440 ming dollargacha bo‘lgan narxlarda sotib olish taklif qilingan.
Layner bortida restoranlar, kafe va barlar, klub hamda konsert maydoni, kutubxona, biznes-markaz, hovuz, fitnes-markaz, spa-saloni, o‘yinlar uchun maydon, shuningdek, kichik tibbiyot markazi ham bor.
Kema jami 650 kishiga mo‘ljallangan. Ammo, Kambodja rasmiylariga ko‘ra, Sianukvil shahridagi portga kelganida uning bortida 203 nafar yo‘lovchi hamda ekipajning 156 nafar a’zosi bor edi. Ayrim yo‘lovchilar allaqachon mamlakatdan uchib ketishgan, boshqalari esa layner suzishni davom ettirishidan umid qilib Kambodjada qolmoqda.