Dronga qarşi millionlik raketa örniga - Helsing yangi havo mudofaa tizimini taqdim etdi
Germaniyaning Helsing kompaniyasi ikki turdagi tutuvçi raketa va sunʼiy intellekt asosidagi boşqaruv dasturini birlaştirgan Contra havo mudofaa tizimini taqdim etdi. Kompaniyaning bildirişiça, tezkor hujumkor dronni tutib yöq qiliş xarajati 100 ming dollardan kam böladi.
Dronga qarshi millionlab turadigan raketalar o‘rniga Helsing yangi havo mudofaa tizimini taqdim etdi. Tizim hozir sinovdan o‘tkazilmoqda. Helsing bosh direktori Gunbert Sherf jurnalistlar uchun taqdimotda Contra’ni 2027-yilning ikkinchi yarmida bozorga chiqarish rejalashtirilganini aytdi.
Loyiha nisbatan arzon dronlarni bir necha million dollarlik raketalar bilan urib tushirish xarajatlarini kamaytirishga qaratilgan. E’lon qilingan narx va imkoniyatlar hozircha ishlab chiqaruvchining baholari hisoblanadi.
Contra tarkibiga AD-1 Inferno va AD-2 Ambush tutuvchi raketalari kiradi. Ular yangi avlod tezkor hujumkor dronlariga qarshi birgalikda qo‘llanishi ko‘zda tutilgan.
Reaktiv dvigatel bilan jihozlangan Inferno soatiga 700 kilometrgacha tezlikka erishishi va 20 kilometr masofada harakatlanishi aytilmoqda. Kompaniya uni eng murakkab nishonlardan tashqari, aksariyat havo tahdidlariga qarshi asosiy vosita sifatida ko‘rmoqda.
Qattiq yonilg‘ili raketa dvigateliga ega Ambush esa soatiga qariyb 3000 kilometr tezlikda ucha oladi. U asosiy mudofaa chiziqlaridan o‘tib ketgan dronlarni tezkor tutib yo‘q qilish uchun ishlab chiqilgan.
Sun’iy intellekt asosidagi dasturiy ta’minot nishonlarni tutish jarayonini muvofiqlashtirishga xizmat qiladi.
Kompaniya yangi raketalarni Rossiyaning Ukrainaga qarshi urushda qo‘llayotgan hujumkor dronlaridagi o‘zgarishlarni hisobga olgan holda ishlab chiqqanini bildirgan.
Xususan, tizim soatiga 400–700 kilometr tezlikda uchishi aytilayotgan «Geran-4» va «Geran-5» kabi apparatlarga qarshi mo‘ljallangan. Bunday tezkor dronlar xususiyatlari jihatidan qanotli raketalarga tobora yaqinlashmoqda.
Helsing vakillariga ko‘ra, raketalarning faol radiolokatsion o‘zini o‘zi yo‘naltirish kallaklari bozorda keng mavjud butlovchi qismlardan tayyorlangan. Bu yechim ishlab chiqarishni katta hajmda yo‘lga qo‘yishni osonlashtirishi kutilmoqda.
Kompaniya rahbariyati bunday yondashuv Xitoy bilan bog‘liq ta’minot zanjirlariga qaramlikni kamaytirishi va AQSh eksport cheklovlari bilan bog‘liq qiyinchiliklarni chetlab o‘tishga yordam berishini ta’kidlagan.