Donald Tramp ikki kunlik tashrifi chogʻida Irlandiya prezidenti bilan uchrashadi

Donald Tramp kelasi hafta Irlandiya Respublikasiga ikki kunlik tashrifi chogʻida Irlandiya prezidenti Ketrin Konnolli bilan uchrashishi kutilmoqda.

AQSh prezidenti shanba kuni, 12 sentyabr kuni «Air Force One» (Birinchi raqamli bort) samolyotida Dublinga yetib kelishi kutilmoqda.

U Konnolli bilan uchrashadi, soʻngra Kler grafligidagi Dunbeg shahrida joylashgan golf maydoniga yoʻl olishdan oldin Taosich (Irlandiya bosh vaziri) Mixol Martin bilan ikki tomonlama uchrashuv oʻtkazadi.

Konnolli bundan avval AQShni Gʻazo boʻyicha pozitsiyasi uchun tanqid qilgan edi, biroq AQSh prezidenti Irlandiyaga kelsa, uni «kutib olishi va salomlashishini» aytgan.

Oʻtgan yili oʻzining prezidentlik kampaniyasi paytida u Trampni «zoʻravon» deb taʼriflagan edi.

«Amerika bilan bogʻliq ishonch muammom bormi? Menimcha, mamlakatdagi har bir kishining Amerika bilan bogʻliq ishonch muammosi bor», — degan edi u.

«Bizda beqaror, oldindan aytib boʻlmaydigan, oʻzini zoʻravondek tutadigan, oʻziga maʼqul kelganda bojlar joriy etadigan prezident (Donald) Tramp bor.

Biz bojlarning oqibatlari haqida gapirishda davom etyapmiz, lekin genotsid oqibatlari haqida gapirmayapmiz».

Tramp oʻtgan yilning mart oyida Muqaddas Patrik kuni bayrami munosabati bilan Oval kabinetda Martin bilan oʻtkazilgan ikki tomonlama uchrashuvda Irlandiya prezidentiga nisbatan «u» (erkak jinsida) deb murojaat qilgan edi.

Konnollining Yaqin Sharqdagi xalqaro huquq buzilishlarini tanqid qilgan fikrlari haqida nima deb oʻylashi soʻralganda, Tramp shunday degan edi: «Qarang, u mening borligimdan baxtiyor, ayta oladigan gapim shu xolos».

BBC News NI nashrining tushunishicha, AQShning Irlandiya poytaxtidagi yangi elchixonasi uchun avvalroq rejalashtirilgan poydevor qoʻyish marosimi endilikda oʻtkazilishi dargumon.

Shu bilan birga, Tramp «Irish Open» golf turniridagi oʻyinlarni tomosha qilishi kutilmoqda va baʼzi manbalarning fikriga koʻra, u yakshanba kuni kechqurun gʻolibga kubokni topshiradi.

Yirik xavfsizlik operatsiyasi Irlandiya xavfsizlik kuchlari tomonidan qatʼiy nazorat qilinadi.

Irlandiyaga tashrif buyurgan oxirgi AQSh prezidenti 2023 yil aprelida Jo Bayden boʻlgan edi.