Daraxtlar şox-şabbasi ortini «köradigan» sunʼiy yöldoş Yerning yangi tasvirlarini oldi
Yevropa kosmik agentligi - ESA Biomass sunʼiy yöldoşining birinçi yilda olgan tasvirlarini eʼlon qildi. Ular tropik örmonlar, Indoneziya mangrzorlari, Yamal tundrasi va Antarktida muzliklarini qamrab oladi. Apparat radari qalin şox-şabba orasidan ötib, daraxtlarning yoğoç qismi haqida maʼlumot töplay oladi.
Daraxtlar shox-shabbasi ortini «ko‘radigan» sun’iy yo‘ldosh Yerning yangi tasvirlarini oldi
Tasvirlar to‘plami 2026-yil 29-aprelda — sun’iy yo‘ldosh uchirilganiga bir yil to‘lishi munosabati bilan taqdim etilgan
Biomass, avvalo, o‘rmonlardagi uglerod zaxiralarini baholash uchun yaratilgan. Unga orbitaga chiqarilgan ilk P-diapazonda ishlovchi sintezlangan aperturali radar o‘rnatilgan. Uning signali qalin shox-shabba orasidan o‘tib, daraxt tanasi va yirik shoxlari to‘g‘risida ma’lumot oladi. O‘rmon uglerodining asosiy qismi aynan yog‘ochda saqlanadi.
To‘plamdagi tasvirlardan biri Angola va Kongo Demokratik Respublikasi chegarasidagi hududlarni ko‘rsatadi. 2025-yil 20-iyunda olingan tasvirda Kongo, Kasai va Kvango havzalaridagi daryo irmoqlari bo‘ylab cho‘zilgan tor o‘rmon yo‘laklari ajralib turadi. Ular orasida savanna hududlari joylashgan.
21-iyunda olingan boshqa tasvirda Yamal yarimorolining bir qismi aks etgan. Tundra fonida ko‘plab yumaloq termokarst ko‘llari ko‘rinadi.
Indoneziyaning Kalimantan hududidagi Berau daryosi deltasida esa radar mangr o‘rmonlari va botqoq tropik o‘simliklar orasidagi tarmoqlangan o‘zanlarni qayd etgan. Bu tasvir 22-iyunda olingan.
Antarktida tasviri 2025-yil 10-noyabrga tegishli. U Palmer Yerining g‘arbiy qismida dengiz tomon harakatlanayotgan Greys muzlik oqimini qamrab oladi. Patga o‘xshash ingichka chiziqlar muzdagi yoriqlarni ko‘rsatadi. Ular muzlik notekis asos ustidan harakatlanganda va sohil tomon tezlashganda yuzaga keladigan ichki kuchlanishlar tufayli paydo bo‘ladi.
Tasvirlardagi ranglar shartli. Ma’lumotlarni qayta ishlashda qaytgan radar signalining turli xususiyatlariga alohida ranglar beriladi. Bu usul yer yuzasi va o‘simliklar tuzilishini farqlashga yordam beradi. Shuning uchun yashil, ko‘k yoki pushti hududlar joyning haqiqiy rangini anglatmaydi.