«Chiqindilar oroli»mi yoki Vashingtonning diqqatga sazovor maskanimi? Golf maydoni Trampni qanday qilib murakkab huquqiy nizoga tortib qoldi
Tramp Vashingtondagi 106 yillik ommaviy golf maydonini professionallar uchun turnirlar oʻtkazishga moʻljallangan golf maydoniga aylantirish rejalari borligini aytdi, biroq mahalliy golfchilar bundan mamnun emas.
«Chiqindilar oroli»mi yoki Kolumbiya okrugining diqqatga sazovor maskanimi? Golf maydoni Trampni qanday qilib chigal huquqiy nizoga tortib ketdi
Jurden Yardan uchun Vashingtonning (Kolumbiya okrugi) sohilboʻyi hududida joylashgan «East Potomac Golf Links» maydonida golf oʻynash haftasiga ikki marta takrorlanadigan odatga aylangan.
«Ijtimoiy kelib chiqishidan qatʼi nazar, xoh golf oʻynashni endi boshlayotgan boʻlsin, xoh... tajribali golfchi boʻlsin — har qanday odam bu yerga kelib, ancha arzon narxda golf oʻynashi mumkin», — dedi 35 yoshli sportchi doʻshanba kuni maydonda lunkaga toʻp kiritar ekan BBCga bergan intervyusida.
Biroq prezident Donald Tramp ushbu maskanning jozibadorligiga tan berayotganga oʻxshamaydi, u doʻshanba kuni oqshom Truth Social tarmogʻida 106 yillik maydonni «Chiqindilar oroli» deb atadi.
Endilikda u ushbu maydonni «jamoatchilik uchun ochiq boʻladigan, shu bilan birga, golfning eng yuqori darajasiga moslashtirilgan hamda jahon darajasidagi turnirlarni oʻtkazishga qodir» boʻlgan maydon barpo etish maqsadida taʼmirlash uchun yopishni rejalashtirmoqda.
Ushbu taʼmirlash ishlari prezidentning AQSh poytaxtini qayta qiyofalantirishga qaratilgan keng koʻlamli va bahsli tashabbusining bir qismi boʻlib, u oʻz ichiga Oq uyning yangi ball zalini, balandligi 250 fut boʻlgan arkani va boshqa azaliy diqqatga sazovor maskanlarga kiritiladigan oʻzgarishlarni oladi. Golf maydoni nisbatan kichikroq loyiha boʻlsa-da, shaharning koʻplab aholisi uchun juda qadrlidir.
Jurden Yardan agar maydon Tramp taklif qilganidek taʼmirlansa, oddiy odamlar bu yerda golf oʻynay olmasligidan xavotirda
Yardanning aytishicha, maydonning ehtimoliy yopilishi, hatto vaqtincha boʻlsa ham, Kolumbiya okrugi madaniyatiga «katta putur yetkazadi» va ushbu maskanning asl mohiyatini oʻzgartirib yuborishi mumkin.
Ishqiboz golfchi va oʻndan ortiq maydonlar egasi boʻlgan Trampning taʼkidlashicha, uning rejasi maydonni «Dunyoning istalgan nuqtasidagi Eng yaxshi va Eng muhtasham Golf maydonlaridan biriga» aylantiradi.
Biroq Tramp oʻz rejalarini amalga oshirishidan oldin sudlar Oq uy va mahalliy jamoatchilik oʻrtasidagi nizoni hal qilishi kerak boʻladi.
Oq uydan 2 milya (3 km) janubda joylashgan ushbu tarixiy maydon Milliy park xizmati tomonidan mamlakat poytaxtida boshqariladigan uchta jamoat maydonidan biridir. Kolumbiya okrugi tarixiy merosni saqlash ligasi va maydonning ikki nafar golfchisi tomonidan kiritilgan daʼvo arizasida suddan Tramp tomonidan rejalashtirilgan taʼmirlashni toʻxtatish soʻralgan.
«Bizning sud jarayonimiz ushbu jamoat durdonasini u xizmat qiladigan odamlar va jamoalar uchun himoya qilishga qaratilgan», — deyiladi daʼvogarlar manfaatini himoya qiluvchi «Democracy Forward» guruhining ijtimoiy tarmoqdagi bayonotida.
Huquqiy kurash shu oyda hukumat sudni yoki daʼvogarlarni ogohlantirmasdan maydondagi koʻplab daraxtlarni kesishni boshlaganidan keyin yanada keskinlashdi.
Federal sudya Tramp maʼmuriyatiga qayta qurish rejalarini kamida 26 oktyabrgacha toʻxtatib turishni buyurdi.
Ishlar toʻxtatilganiga qaramay, Tramp yakshanba kuni ijtimoiy tarmoqda maydon taʼmirlash ishlariga yoʻl ochish uchun noyabr oyidan boshlab 15 oyga yopilishini yozib qoldirdi. U shuningdek, qayta loyihalashtirilgan maydonning vizual tasvirini ham joylashtirdi.
«Amaldagi Maydon eskirgan, yaroqsiz, xarob ahvolda va undan foydalanishning boshqa iloji ham, samarasi ham qolmagan. U juda yomon ahvolda, daraxtlari qulayotgan, xavfli va kasallikka chalingan, eng muhimi, sohil devori yemirilayotgan va xavfli boʻlib qolgan», — deb yozdi Tramp yakshanba kungi postida.
Daʼvo arizasida ishtirok etmayotgan golfchi Tomas Snou maydonga «pardoz berish» zarar qilmasligiga rozi boʻlsa-da, prezidentning tavsifini «oshirib yuborilgan mubolagʻa» deb ataldi.
Tomas Snou 15 yildan beri «East Potomac»da golf oʻynaydi
Hozirda «East Potomac» prezident tomonidan barpo etilishi bilan tanilgan hashamatli xususiy golf maydonlarida kutish mumkin boʻlgan darajadagi mukammal sharoitlarni taqdim etmaydi. Bu jamoat maydoni hamma uchun ochiq va aʼzolikni talab qilmaydi.
Kolumbiya okrugidagi ushbu maydonning sharoitlari nisbatan kamtarona boʻlib, oq dasturxonli restoranlar va hashamatli kiyinish xonalari oʻrniga ovqatlanish burchaklari (fud-kort) uslubidagi taomlanish joylariga ega.
«East Potomac»da muntazam oʻynab turadigan Snou va Yardan kabi golfchilar BBCga ushbu maskan hamyonboplik va shaharga yaqinlikning kamdan-kam uchraydigan uygʻunligini taklif qilishini aytishdi.
«Agar hamma narsani tozalab tashlashni boshlasangiz, bu shunchaki toʻp uradigan boʻsh yer maydoniga aylanib qoladi; oʻylashimcha, bu golf maydonining madaniyatini yoʻqqa chiqaradi», — dedi Yardan.
70 yoshli golfchi sifatida Snou «East Potomac»ga borganida 18 ta lunka uchun 29 dollar (21,65 funt sterling) toʻlaydi.
«Butun DMV hududida (Kolumbiya okrugi va unga yondosh Merilend hamda Virjiniya shahar atrofi hududlarini oʻz ichiga olgan aglomeratsiya) bunday narxda yaxshigina 18 ta lunkada oʻynash mumkin boʻlgan boshqa hech qanday joy yoʻq», — dedi u.
Snou agar Trampning taklifi amalga oshsa, narxlar tufayli odamlarning qurbi yetmay qolishidan qoʻrqadi.
Haftasiga ikki marta golf oʻynaydigan Yardan ham ushbu xavotirlarni maʼqulladi.
«Qachonki katta liga, katta golfchilar haqida eshitsangiz, bu avtomatik ravishda katta narxlarni ham anglatadi», — dedi u. «Ushbu golf maydonida menga eng maʼqul keladigan narsa... bu uning hamyonbopligidir», — dedi u.
«East Potomac Golf Links» Vashingtondagi (Kolumbiya okrugi) uchta jamoat golf maydonidan biridir.