Trampning ulkan arka qurish rejalari oldinga siljimoqda
Balandligi 250 fut boʻlgan arkani qurish va undan harbiy maqsadlarda foydalanishga qarshilik kuchaymoqda, Demokratik partiya vakillaridan biri Trampning rejalarini «ahmoqona» deb qoraladi.
Trampning ulkan arka qurish rejasi oldinga siljimoqda
AQSh Prezidenti Donald Trampning ulkan arka qurish rejalari, federal maslahat kengashi 250 futlik (76 metr) inshootning yaqin atrofdagi tarixiy joylarga ehtimoliy taʼsirini qanday hal qilish boʻyicha muhokamalarni yakunlaganidan soʻng, oldinga siljiyotgandek koʻrinmoqda.
Tramp tomonidan tayinlangan aʼzolardan iborat kengash payshanba kuni loyiha boʻyicha talab qilinadigan maslahatlashuvlarni yopayotganini maʼlum qildi va buni Vashington hamda Virjiniya shtatining tarixiy merosni saqlash boʻyicha rasmiylari zararni kamaytirish rejalarini maʼqullashdan bosh tortgani bilan izohladi.
Qarshiliklar kuchayib borayotganiga qaramay, qurilish ishlari shu oyda boshlanishi kutilayotgan edi.
Juma kuni Demokratik partiyadan senator Temmi Dakvort arkadan mudofaa maqsadlarida foydalanish takliflarini «ahmoqona» deb qoraladi va uni «Trampning navbatdagi xudbinlik loyihasi» deb taʼrifladi.
Shu hafta boshida Tramp taklif qilinayotgan «Zafar arkasi» harbiy texnikani saqlash joyi boʻlib ham xizmat qilishini, uning tomi va maydonidan merganlar (snayperlar) va dronlarni ishga tushirish imkoniyati mavjud boʻlishini aytgan edi.
Pentagon va Federal aviatsiya maʼmuriyatiga (FAA) yoʻllagan maktubida Dakvort ular «bu ahmoqona rejani rad etishlari va buning oʻrniga havo hududi xavfsizligini oshirishga eʼtibor qaratishlari kerak»ligini taʼkidladi.
Arka Virjiniyadagi Arlington milliy qabristonining shundoqqina tashqarisida va 2025 yilda harbiy vertolyot va tijorat samolyoti oʻrtasida fojiali toʻqnashuv yuz bergan Ronald Reygan nomidagi Vashington milliy aeroportidan taxminan 4 milya (6 km) uzoqlikda joylashgan hududda qurilishi rejalashtirilgan.
«Amerika xalqi Trampning gavjum yaqinlashish yoʻli boʻylab 250 futlik (72 metr) inshootni joylashtirish haqidagi xavfli rejasiga, ayniqsa, u arkada merganlarni joylashtirish va dronlarni uchirish rejalarini amalga oshiradigan boʻlsa, tomoshabin boʻlib tura olmaydi», deb yozdi Dakvort BBC’ning AQShdagi hamkori CBS News tomonidan qoʻlga kiritilgan maktubida.
Biroq, FAA oʻtgan hafta ushbu ulkan inshoot aeroportga qoʻnayotgan yoki undan uchayotgan samolyotlar uchun xavf tugʻdirmasligini maʼlum qildi.
Payshanba kuni Tarixiy merosni saqlash boʻyicha maslahat kengashi (u ham Tramp tomonidan tayinlanganlar tomonidan boshqariladi) mahalliy rasmiylar bilan inshootning hududdagi 42 ta tarixiy obʼyektga qanday taʼsir qilishi mumkinligi boʻyicha talab qilinadigan maslahatlashuvlarni yakunlayotganini bildirdi.
Oʻz bayonotida kengash federal diqqatga sazovor joylarni boshqaradigan Milliy parklar xizmati ushbu obʼyektlarga yetkazilishi mumkin boʻlgan zararni kamaytirish rejasini taklif qilganini, biroq mahalliy tarixiy merosni saqlash xodimlari «Zafar arkasining maqsadi va zarurati yuzasidan xavotir bildirishganini» aytdi. Ular, shuningdek, xizmat ehtimoliy zararlarni toʻgʻri aniqlagani va ularga qarshi kurashish uchun yetarli chora-tadbirlarni rejalashtirganiga shubha qilishdi.
Federal va shtat rasmiylari loyihaning zararni kamaytirish rejalari boʻyicha kelishishga majbur emaslar va agar ikki tomon konsensusga erisha olmasa, maslahatlashuvlar toʻxtatilishi mumkin. Kengash kelasi oy boshida ushbu jarayon boʻyicha yakuniy hisobotni taqdim etishni rejalashtirmoqda.
Shu bilan birga, Virjiniyadan Demokrat kongressmen Don Beyer arka qurilishi kerak boʻlgan joyda qazish ishlari boshlab yuborilganini aytmoqda.
Arkaga qarshi kongress muxolifatiga rahbarlik qilayotgan Beyer payshanba kuni ushbu hududga tashrif buyurganida ishchilarning ogʻir texnikadan foydalanayotganini koʻrganini va ular unga «tuproq tarkibini baholash uchun arxeologik ishlar olib borishayotganini» aytishganini bildirdi.
Bu «juda tashvishli», dedi Beyer, ayniqsa, maʼmuriyat ish boshlanishidan 48 soat oldin xabar berishi talab qilinishini hisobga olsak.
«Maʼmuriyat ushbu loyihaning oqibatlarini tushunish uchun zarur boʻlgan asosiy ishlarni hali bajarmagan boʻlsa-da, hududdagi faoliyatni oldinga surayotganga oʻxshaydi», deb yozdi Beyer.
Shu yil boshida eʼlon qilingan dizayn loyihasi arka tepasida oltin rangli, qanotli Ozodlik maʼbudasi, uning ikki tomonida ikkita oltin burgut va inshootning har ikki tomonida oltin harflar bilan yozilgan «One Nation Under God» (Xudo panohidagi yagona millat) va «Liberty and Justice for All» (Barcha uchun ozodlik va adolat) iboralari tasvirlanganini koʻrsatadi.