Chernixivga zarba: ikki kishi, jumladan 4 yoshli qiz halok boʻldi
Rossiya qoʻshinlarining Chernixivga zarbasi oqibatida xususiy uyda boʻlgan 39 yoshli ayol va 4 yoshli qiz halok boʻldi. 14 yoshli qiz kasalxonaga yotqizildi. Shaharga takroriy zarba natijasida yana toʻrt kishi jarohatlangan, vayronalar ostida odamlar qolgan boʻlishi mumkin.
**Chernixivga hujum: 4 yoshli qiz va ayol halok boʻldi**
26-avgustga oʻtar kechasi va ertalab Rossiya qoʻshinlari Ukrainaning bir qator hududlariga hujum uyushtirdi.
Chernixiv shahar kengashi matbuot xizmatining xabar berishicha, erta tongda shaharga berilgan zarba natijasida xususiy uyda yongʻin kelib chiqqan. Uy olovdan deyarli butunlay vayron boʻlgan. Hujum vaqtida uyda boʻlgan uch kishidan ikki nafari – 39 yoshli ayol va 4 yoshli qiz voqea joyida halok boʻlgan. 14 yoshli qiz esa jarohat olib, shifoxonaga yotqizilgan.
Keyinroq Chernixivga takroriy zarba berilgan. Shahar harbiy maʼmuriyati rahbari Dmitriy Brijinskiyning maʼlum qilishicha, hujum natijasida ombor binosi shikastlangan va toʻrt kishi jarohatlangan. Chernigov shahar kengashining xabariga koʻra, ikkinchi zarba ertalab hujum qilingan manzilga yana berilgan va vayronalar ostida odamlar qolgan boʻlishi mumkin.
Rossiya qoʻshinlari Donetsk va Xerson viloyatlariga ham zarbalar bergan. Xerson viloyati harbiy maʼmuriyati rahbari Aleksandr Prokudinning maʼlum qilishicha, soʻnggi bir sutkada Rossiya hujumlari oqibatida bir kishi halok boʻlgan, 12 kishi jarohatlangan. Uning soʻzlariga koʻra, zarbalar muhim va ijtimoiy infratuzilma obyektlari, shuningdek, aholi yashash hududlariga berilgan. Natijada sakkizta koʻp qavatli va beshta xususiy uy shikastlangan. Bir kun avval hududdagi jamoalardan 15 kishi evakuatsiya qilingan.
Donetsk viloyatining Kramatorsk tumanidagi Slavyansk shahriga berilgan aviatsiya zarbasi natijasida ikki kishi jarohatlangan. Shahar harbiy maʼmuriyati rahbari Vadim Lyaxning maʼlum qilishicha, portlashlar shahar markazida sodir boʻlgan va kamida 12 ta koʻp qavatli uyga zarar yetgan.
Tungi havo hujumi Kiyevda ham qayd etilgan. Shahar meri Vitaliy Klichkoning bildirishicha, Goloseyevskiy tumanida dron parchalari 16 qavatli turar joy binosiga tushgan. Binoning 14-qavatida devorlar shikastlangan va derazalar singan. Bir ayol jarohatlangan, kelib chiqqan yongʻin esa oʻchirilgan.
Ukraina Harbiy-havo kuchlarining ertalabki maʼlumotiga koʻra, Rossiya armiyasi 26-avgustga oʻtar kechasi Ukrainaga 162 ta zarba beruvchi va imitatsion dron bilan hujum qilgan. Ular orasida Shahed, "Gerbera" va "Parodiya" turidagi uchuvchisiz uchish apparatlari boʻlgan. Ukraina tomoni maʼlumotiga koʻra, dronlar Kursk, Oryol, Primorsko-Axtarsk, Rossiya nazoratidagi Donetsk hamda qoʻshib olingan Qrimdagi Gvardeyskoye hududidan uchirilgan.