Chaqaloqlar oʻlimidan soʻng Pokistonda sogʻliqni saqlash tizimidagi eng katta amaldor ishdan olindi
Islomoboddagi davlat kasalxonasida sodir boʻlgan yongʻin kamida 14 chaqaloqning oʻlimi bilan yakunlandi. Qurbonlarning yaqinlari binodagi xavfsizlik choralarini savol ostiga olmoqda.
Pokistonda 26-avgust kuni ertalab shifoxonaning tugʻruq boʻlimida yuz bergan yongʻin oqibatida kamida 14 nafar yangi tugʻilgan chaqaloq halok boʻlganidan soʻng, mamlakat sogʻliqni saqlash tizimidagi eng yuqori lavozimli amaldor ishdan boʻshatildi.
Rasmiylarning maʼlumotlariga koʻra, yongʻin konditsioner blokida boshlangan. Palatadagi chaqaloqlar esa yo inkubatorlarda boʻlgan, yoki kislorod uskunalariga ulangan boʻlgan. Ushbu fojia Islomoboddagi davlat kasalxonasining xavfsizlik choralari boʻyicha bir qancha savollarni keltirib chiqarmoqda.
Qurbonlardan birining otasi, ismini oshkor etmasdan, Reuters agentligiga palataning ahvoli yomonligini bildirgan: "Men sakkiz kundan beri u yerga qatnayotgandim. U binoda yongʻin xavfsizligi taʼminlanmagan, tegishli chiqish yoʻllari ham yoʻq edi. Barcha eshiklar yopiq edi, bolalarimizni koʻrishimiz uchun faqat bitta eshik ochib qoʻyilgan. Ular bolalarimizni juda tez-tez koʻrishga kelamiz, deb xavotirlanib, boshqa eshiklarni qulflab qoʻyishgan edi".
Kasalxonaning ijrochi direktori esa BBC nashriga tugʻruq boʻlimining eshigi qulflanmaganini, biroq chaqaloqlarni oʻgʻirlab ketish ehtimolidan himoya qilish uchun unga qoʻriqchi qoʻyilganini bildirdi.
Kasalxonadagi tartibsiz va dahshatli manzaralarni tasvirlagan baʼzi guvohlar qutqaruvchilarning javob harakatlari sekin boʻlganidan shikoyat qilishmoqda. Ulardan biri Xurram Mahmud AFP axborot agentligiga yongʻinda uch kunlik qizidan ayrilganini aytdi va qutqaruvchilarning yetib kelishi uchun soatlar ketganini taʼkidladi: "Biz yoʻl boʻyida yordam kutib oʻtirgan edik".
Yana bir guvoh esa yongʻin "juda tez" tarqalib ketganini aytdi. U bemorlarni qutqarishga yordam berish maqsadida kasalxonaga kirgani, biroq tugʻruq boʻlimiga yetib bora olmaganini taʼkidladi: "Ichkarini qalin qora tutun qoplagan va bemorlar qamalda qolgan edi... qutqaruv guruhlari qariyb ikki soatdan keyin yetib keldi".