Buyuk Britaniyada 20 yildan soʻng tank pushkasi stvollarini ishlab chiqarish qayta tiklandi
Mudofaa vaziri Buyuk Britaniya oʻz qurolli kuchlari uchun «qurol ishlab chiqarish biznesiga qaytganini» aytdi.
Tank stvollarini ishlab chiqarish 20 yildan soʻng Buyuk Britaniyaga qaytdi
Rheinmetall korxonada 100 ta ish oʻrni yaratilganini va kelajakda xodimlar sonini yanada oshirishni rejalashtirayotganini maʼlum qildi.
Yangi ishlab chiqarish zavodining ishga tushirilishi bilan tanklar uchun qurol stvollarini ishlab chiqarish 20 yil ichida birinchi marta Buyuk Britaniyaga qaytdi.
Telfordda joylashgan va Germaniyaning Rheinmetall mudofaa kompaniyasi tomonidan boshqariladigan "UK Gun Hall" zavodida 100 ta ish oʻrni yaratildi hamda u yerda yirik kalibrli qurollar uchun stvollar va zatvorlar ishlab chiqariladi.
Mudofaa vaziri Ues Striting payshanba kuni boʻlib oʻtgan ochilish marosimida ishtirok etdi va Britaniya oʻz qurolli kuchlari uchun "qurol ishlab chiqarish biznesiga qaytganini" aytdi.
"Boʻsh joydan sakkiz oy ichida toʻliq ishlab chiqarishgacha boʻlgan yoʻl — bu amaldagi jadal qayta sanoatlashtirishdir", dedi u.
"Dunyo darajasidagi ishlab chiqarishda 100 ta malakali ish oʻrni va 20 yil ichida birinchi marta Buyuk Britaniya hududiga yirik kalibrli qurollar ishlab chiqarishning qaytishi — oʻsish dvigateli sifatidagi mudofaa aynan shunday koʻrinishga ega", deya qoʻshimcha qildi Striting.
Rheinmetall maʼlumotlariga koʻra, stvollar va zatvorlar 120 mm va 155 mm lik qurol tizimlari, jumladan RCH 155 va kelajakdagi artilleriya platformalari uchun ishlab chiqariladi.
Kompaniya allaqachon Buyuk Britaniyaning "Boxer" jangovar mashinalari dasturining bir qismi hisoblanadi va mamlakatning "Challenger" tanklarini modernizatsiya qilmoqda.
Ues Striting ushbu majmuaning ochilishi Britaniyaning mudofaa salohiyatini oshirishini aytdi.
Telforddan mutaxassis xodimlar ishga qabul qilindi va kompaniya ishlab chiqarish hajmi kengaygani sari xodimlar sonini oshirishini maʼlum qildi.
Zavod ochilishidan oldin xodimlar Germaniyadagi Rheinmetall korxonasida boʻlib, u yerda aniq ishlab chiqarish, sifatni taʼminlash va maxsus qurollar ishlab chiqarish boʻyicha oʻqitildi.
Rheinmetall bosh ijrochi direktori Armin papperger qurol zavodi mamlakat sanoat bazasini "kelgusi oʻn yilliklar uchun" mustahkamlaydigan "muhim bosqich" ekanini aytdi.
"Biz Buyuk Britaniyaga uzoq muddatli sarmoya kiritishga, sanoat maydonimizni kengaytirishga va kelajak uchun zarur boʻlgan imkoniyatlarni taʼminlash uchun birgalikda ishlashga sodiqmiz", deya qoʻshimcha qildi u.