Buxoroda ilk bor Yashil Uyim ekofestivali bo‘lib o‘tadi
Buxoroda 31-oktabr kuni ilk bor Yashil Uyim ekofestivali bo‘lib o‘tadi. Kattalar va bolalar uchun muhokamalar, ilmiy tajribalar, o‘yinlar, kitob almashinuvi va robototexnika mashg‘ulotlari tayyorlangan. Ishlatilgan batareya, qog‘oz va plastiklarni topshirish ham mumkin. Festival YeI ko‘magida o‘tkazilmoqda.
Buxoroda ilk bor Yashil Uyim ekofestivali o‘tkaziladi
31-oktabr kuni Buxoroda Yevropa Ittifoqining moliyaviy ko‘magida ilk bor Yashil Uyim ekofestivali bo‘lib o‘tadi, deya Gazeta’ga YeIning O‘zbekistondagi delegatsiyasi ma’lum qildi.
Tadbir “Yashil diplomatiya haftaligi” doirasida tashkil etilmoqda. Uning maqsadi ishtirokchilarni atrof-muhitni muhofaza qilish usullari bilan tanishtirish va kundalik hayotga ekologik odatlarni joriy etishga ko‘maklashishdan iborat.
Festival Plove restorani hududida (Tagbandbafon ko‘chasi 3-uy) o‘tkaziladi. Kattalar va yoshlar uchun mo‘ljallangan asosiy maydon soat 12:00 da dijey set va sovrinli o‘yinlar bilan faoliyatini boshlaydi.
Soat 13:00 da surdotarjimon E’zoza Ahmedova inklyuziv muloqot bo‘yicha kirish mashg‘ulotini olib boradi. Shundan so‘ng “Oruzlarimiz shahri” jamoaviy o‘yini bo‘lib o‘tadi, unda ishtirokchilar o‘zlari yashashni istagan shaharni tasavvur qilib ko‘rishlari mumkin bo‘ladi.
Soat 15:00 da ekofaol, festival tashabbuskori va tashkilotchisi Mo‘tabar Xushvaqtova “Plastik muammo emasmi?” mavzusida interaktiv sessiya o‘tkazadi. Unda plastik chiqindilar bilan bog‘liq muammolar va ularni hal etish imkoniyatlari muhokama qilinadi.
Parallel ravishda, 2023-yilda YeI Yoshlar maslahat kengashida ishtirok etgan jurnalist va hujjatli filmlar muallifi Shahzoda Mirakova ingliz tilida “Ekofeminizm: Iqlim o‘zgarishi erkaklar va ayollarga bir xil ta’sir qiladimi?” mavzusida muhokama olib boradi. Ishtirokchilar iqlim o‘zgarishining gender jihatlarini muhokama qiladi.
Bolalar hududida ilmiy tajribalar, robototexnika bo‘yicha mashg‘ulotlar va neyromotor ko‘nikmalarni rivojlantiruvchi o‘yinlar tashkil etilishi rejalashtirilgan. Ota-onalar, shuningdek, bolani maktabga stressiz tayyorlash bo‘yicha tavsiyalar olishlari mumkin.
Soat 13:00 dan 16:00 gacha tashrif buyuruvchilar ilmiy hudud va ekologik toza mahsulotlar yarmarkasida bo‘lishi, kitob almashinuvida qatnashishi hamda shaxmat o‘ynashi mumkin.
Maxsus qabul punktlarida ishlatilgan batareyalar, ishlatilgan o‘simlik yog‘i, qog‘oz, plastik paketlar va alyuminiy qabul qilinadi. Tashkilotchilar fikricha, bu chiqindilarni saralab yig‘ish, qayta ishlash va resurslardan mas’uliyat bilan foydalanishga e’tibor qaratishga yordam beradi.
“Yashil diplomatiya haftaligi” kampaniyasi ekologik xabardorlikni oshirish, iqlim tashabbuslarini qo‘llab-quvvatlash va barqaror rivojlanishni ilgari surishga qaratilgan. U mahalliy jamoalar, fuqarolik jamiyati, yoshlar va boshqa hamkorlarni birlashtiradi, deydi tashkilotchilar.