Britaniya Saudiya Arabistonini husiychilardan himoya qilish uchun qiruvchilar yubormoqda
Buyuk Britaniya Yamandagi husiychilarning raketa va dron hujumlaridan Saudiya Arabistonini himoya qilish uchun Eurofighter Typhoon qiruvchilarini yubormoqda. Londonga koʻra, samolyotlar faqat shaharlar va muhim infratuzilmani himoya qilish vazifalarini bajaradi, hujumlarda qatnashmaydi.
Britaniya Saudiya Arabistonini husiychilardan himoya qilish uchun qiruvchilar jo‘natmoqda
DW xabariga ko‘ra, Britaniya Mudofaa vazirligi bu haqda 20-oktabr kuni ma’lum qilgan. Bu qaror Eronga ittifoqchi husiychilarning Saudiya Arabistoniga hujumlari kuchaygan bir paytda qabul qilingan.
Qiruvchilardan tashqari, Britaniya harbiy texnikani tashish uchun Airbus A400M transport samolyotini ham yuboradi. Shuningdek, mamlakatga britaniyalik harbiy maslahatchilar ham jo‘natiladi.
London husiychilarning fuqarolik obyektlariga, jumladan, Ar-Riyod aeroportiga uyushtirgan zarbalarini qoraladi. Britaniya mudofaa vaziri Ues Striting bu hujumlarni mintaqadagi vaziyatni keskinlashtiruvchi harakatlar deb atagan.
10-oktabr kuni Ar-Riyoddagi Qirol Xolid nomidagi xalqaro aeroportga berilgan raketa zarbasi oqibatida 13 kishi halok bo‘lgan, yana 308 kishi jarohatlangan. Hujum uchun javobgarlikni husiychilar o‘z zimmasiga olgan.
Guruh Saudiya Arabistoni havo hududini «harbiy operatsiyalar zonasi» deb e’lon qilib, yo‘lovchi samolyotlarini undan foydalanmaslikka chaqirgan. Keyinroq aeroport yana hujumlarga uchragan.
Husiychilar sentabr boshida Yaqin Sharqdagi harbiy harakatlarini kengaytirishini bildirgan va Saudiya Arabistoni janubidagi to‘rt shaharga zarba bergan edi. O‘sha hujumlarda 70 dan ortiq kishi jabrlangan, neft obyektlarida yong‘inlar chiqqan. Saudiya tomoni esa Yamanning husiychilar nazoratidagi viloyatlariga 60 dan ortiq havo zarbasi bergan.
Sentabr oyida husiychilar Qizil dengiz sohilidagi Moxa porti va Bob al-Mandab bo‘g‘ozidagi ayrim orollarni ham egallagan. Mazkur bo‘g‘oz jahon savdosi va neft tashuvlari uchun muhim yo‘nalish hisoblanadi.
Guruh Bob al-Mandab orqali harakatlanish Saudiya kemalaridan tashqari barcha tijorat kemalari uchun xavfsiz ekanini da’vo qilgan. 19-sentabrda esa Saudiya boshchiligidagi koalitsiya husiychilarning Ar-Riyodga yo‘naltirilgan ballistik raketasi tutib qolinganini ma’lum qilgan edi.