Britaniya maktablarida ukrainalik bolalar rus tilini o‘rganishga majburlandi. Hukumat uzr so‘radi
Ukrain tilidan imtihon topshirish imkoniyati bo‘lmagani sabab Britaniyaning ayrim maktablarida ukrainalik qochqin bolalar rus tilini o‘rganishga majburlangan. Hukumat ulardan uzr so‘rab, 2028-yildan ukrain tili bo‘yicha imtihon joriy etilishini ma’lum qildi.
Britaniya maktablarida ukrainalik bolalar rus tilini o‘rganishga majbur bo‘ldi. Hukumat uzr so‘radi
Buyuk Britaniya hukumati maktablarda ukrain tilidan imtihon topshirish imkoni bo‘lmagani sabab rus tilini o‘rganishga majbur qilingan ukrainalik qochqin bolalardan uzr so‘radi.
“Ko‘plab o‘quvchilar rus tilidan imtihon topshirishga majbur bo‘lgan. Ular shunday vaziyatga tushib qolganidan chin dildan afsusdaman. Endi ukrain tilidan GCSE imtihonini topshirish imkoniyatini yaratish masalasi juda muhim”, — dedi Guld.
2022-yilda Rossiya Ukrainaga keng ko‘lamli bosqin boshlaganidan keyin Buyuk Britaniyaga 30 mingdan ortiq ukrainalik bola kelgan. Mamlakatda ukrain tili bo‘yicha GCSE imtihoni yo‘qligi sababli ayrim maktablar ularni rus tilini tanlashga majburlagan. 2024-yilda Ukraina Ta’lim vazirligi bolalarga bosim o‘tkazilayotgani yuzasidan Britaniya hukumatiga shikoyat qilgan.
Yangi imtihonni ishlab chiqish AQA tashkilotiga topshirildi. Britaniya Ta’lim vazirligi buning uchun 340 ming funt sterling ajratdi.
Guld Londondagi Avliyo Mariya ukrain maktabiga tashrifi chog‘ida 20 yoshli Vitaliy Andronik bilan uchrashdi. U 15 yoshida rus tilidan imtihon topshirishga qattiq undalganini aytdi.
“Men uchun endi kech, ammo kelajakda keladigan qochqin bolalar ukrain tilini o‘rganish imkoniyatiga ega bo‘lishini istayman. Bu biz boshdan kechirgan ruhiy jarohatlarning tan olinishini anglatadi”, — dedi u.
2024-yilda Ukrainaning Zakarpatye viloyatidan Britaniyaga qochib kelgan 16 yoshli Sofiya Chonka ham rus tilini o‘rganishdan bosh tortganini aytdi.
“To‘qqizinchi sinfda menga rus tilini o‘rganishim kerakligini aytishdi. Men esa shunchaki yo‘q dedim. Rossiya bilan hech qanday aloqam bo‘lishini istamadim. Ular yurtdoshlarimni o‘ldirdi, oila a’zolarimni yaraladi”, — dedi qiz.
Ukraina jamoat tashkilotlari 2014-yilda Rossiya Qrimni anneksiya qilganidan beri Britaniyada ukrain tili bo‘yicha GCSE imtihonini joriy etishga harakat qilib kelgan. St Mary’s Trust tashkiloti rahbari Inna Grigorovich endi ukrain tilidan A-level imtihonini ham joriy ettirishga harakat qilmoqda. Britaniyada ushbu imtihon natijalari universitetlarga kirishda hisobga olinadi.