Bolgariya Qora dengizdagi kemalarga qilingan yangi hujumlardan soʻng dengizchilar bedarak yoʻqolganini maʼlum qildi

Bolgariya Qora dengizdagi kemalarga qilingan yangi hujumlardan keyin dengizchilar bedarak yoʻqolganini maʼlum qildi

Bolgariya rasmiylariga koʻra, Qora dengizda dron hujumidan soʻng bitta savdo kemasi choʻkib ketgan va uning ekipaji bedarak yoʻqolgan.

Bosh vazir Rumen Radevning aytishicha, gʻalla tashiyotgan ikkinchi kema ham Bolgariyaning eksklyuziv iqtisodiy zonasi ichida zarbaga uchragan. Uning 18 kishidan iborat ekipaji qutqarib qolingan.

Radev hujumlar uchun kim javobgar ekanini aytmadi. Ushbu hujumlar Rossiyaning Ukrainaga qarshi urushi doirasida Qora dengizdagi zarbalarini kuchaytirayotgan bir paytda sodir boʻldi.

Moskva ushbu soʻnggi hodisa yuzasidan izoh bermadi. Bundan bir kun avval Ukraina Prezidenti Vladimir Zelenskiy Rossiyani makkajoʻxori tashiyotgan fuqarolik kemasiga zarba berganlikda ayblagan edi.

Radevning soʻzlariga koʻra, hujumlarda havo va dengiz dronlaridan foydalanilgan boʻlib, ular taxminan soat 03:00 da (Grinvich boʻyicha 23:00) Bolgariya sharqidagi Byala sohilboʻyi shahridan taxminan 70 mil (112 km) uzoqlikda sodir boʻlgan.

Uning aytishicha, choʻkib ketgan kema Togo bayrogʻi ostida suzayotgan boʻlgan.

Yaqin atrofda Bolgariya kemasi boʻlgan, ammo u yetib kelganida faqat agʻdarilib ketgan qayiq, sollar va qutqaruv nimchalarigina koʻringan. Kema bortida qancha ekipaj aʼzosi boʻlgani nomaʼlum. Qidiruv-qutqaruv operatsiyasi boshlangan. Kemaning yuki nimadan iborat boʻlgani hozircha aniqlanmagan.

Radevning bildirishicha, bolgariyalik dengizchilar ikkinchi kema ekipajini, jumladan, bortdagi yongʻinda jarohatlangan ikki kishini qutqarib qolishgan. Ularning 11 nafari Turkiya, yetti nafari esa Hindiston fuqarolaridir. Kema gʻalla tashiyotgan boʻlgan.

Radev ushbu zarbalarni «dengiz huquqining qoʻpol ravishda buzilishi» deb qoraladi.

U jurnalistlarga shunday dedi: «Bolgariyaning eksklyuziv iqtisodiy zonasi doirasida bunday hujumning amalga oshirilishi mutlaqo qabul qilinishi mumkin emas».

Bolgariyaning Qora dengizdagi eksklyuziv iqtisodiy zonasi 29 000 kvadrat kilometrdan (11 197 kvadrat mil) sal koʻproqni tashkil etadi, bu Qora dengiz umumiy maydonining taxminan 6 foizi demakdir.

Seshanba kuni Odessa yaqinida sodir boʻlgan alohida hujum oqibatida bir ekipaj aʼzosi halok boʻldi va yana yetti kishi jarohatlandi. Ukraina OAVlariga koʻra, ushbu kema Marshall orollari bayrogʻi ostida suzayotgan boʻlgan.

Yakshanba kuni Rossiya Mudofaa vazirligi Zelenskiyning oʻtgan hafta boshida Kiyev Rossiya neftni qayta ishlash zavodlariga hujumlarni kuchaytirishi haqida aytgan soʻzlariga javoban Ukraina boʻylab zarbalarni kuchaytirishini maʼlum qilgan edi.

Rossiya 2022 yilning fevralida Ukrainaga qarshi keng koʻlamli bosqinni boshlagan.