Bolalar ombudsmani Namangandagi bogʻchada bolaga nisbatan zoʻravonlik sodir etilgani holati boʻyicha oʻtkazilgan tekshiruvni qayta koʻrib chiqishni talab qildi
Oʻzbekiston Bolalar ombudsmani Surayyo Rahmonova Maktabgacha va maktab taʼlimi vazirligidan Namangan viloyati Uchqoʻrgʻon tumanidagi bogʻchada besh yoshli bolaga nisbatan sodir etilgan boʻlishi mumkin boʻlgan jinsiy zoʻravonlik ishi boʻyicha xizmat tekshiruvi natijalarini qayta koʻrib chiqishni talab qildi. Jinoyat ishi 12 sentyabr kuni Uchqoʻrgʻon tumani IIB tergov boʻlinmasi tomonidan qoʻzgʻatilgan. Shu kunning oʻzida gumonlanuvchi qoʻlga olingan, sud esa unga nisbatan ehtiyot chorasini tanlagan […]
Bolalar ombudsmani Namangandagi bogʻchada bolaga nisbatan zoʻravonlik sodir etilgani holati boʻyicha tekshiruvni qayta koʻrib chiqishni talab qildi
Oʻzbekiston Bolalar ombudsmani Surayyo Rahmonova Maktabgacha va maktab taʼlimi vazirligiga Namangan viloyati Uchqoʻrgʻon tumanidagi bogʻchada besh yoshli bolaga nisbatan jinsiy zoʻravonlik sodir etilgan boʻlishi mumkinligi ishi boʻyicha xizmat tekshiruvi yakunlarini qayta koʻrib chiqish talabi bilan murojaat qildi.
Jinoyat ishi 12 sentyabr kuni Uchqoʻrgʻon tumani IIB huzuridagi tergov boʻlinmasi tomonidan qoʻzgʻatilgan. Shu kunning oʻzida gumonlanuvchi qoʻlga olingan, sud esa unga nisbatan qamoqqa olish tarzidagi ehtiyot chorasini tanlagan. Dastlabki tergov harakatlari davom etmoqda.
Ombudsman taqdimnomasi vazirlikka 22 sentyabr kuni yuborilgan. Idoraga dastlabki tekshiruv natijalarini tanqidiy baholash, aniqlangan kamchiliklarni bartaraf etish va masʼul xodimlarni qonunda nazarda tutilgan javobgarlikka tortishni taʼminlash topshirilgan.
Ombudsman sodir boʻlgan voqeaga imkon bergan boʻlishi mumkin boʻlgan sabab va shart-sharoitlarga alohida eʼtibor qaratdi. Vazirlikka maktabgacha taʼlim tashkilotlari xodimlari faoliyati ustidan nazoratni kuchaytirish va bolalar xavfsizligini taʼminlashning ichki mexanizmlarini qayta koʻrib chiqish topshirildi.
Bundan avval ijtimoiy tarmoqlarda voqea sodir boʻlgan vaqtda bola nazoratsiz qolgan boʻlishi mumkinligi, hodisadan keyin esa oilaga goʻyoki bosim oʻtkazilgani haqida maʼlumotlar tarqalgan edi. Bu maʼlumotlar rasman tasdiqlanmagan.
Shu bilan birga, ombudsman xabarida dastlabki xizmat tekshiruvi davomida aynan qanday qonunbuzarliklar aniqlangani va aynan kimlar javobgarlikka tortilishi mumkinligiga aniqlik kiritilmagan.
Vazirlik 15 kun ichida Bolalar ombudsmaniga koʻrilgan choralar toʻgʻrisida maʼlumot taqdim etishi va tasdiqlovchi hujjatlarni ilova qilishi lozim.