BMT nazoratsiz SI tufayli insoniyatni «jiddiy tahdid» kutayotganidan ogohlantirdi
BMT Inson huquqlari boʻyicha Oliy komissari Folker Tyurk sunʼiy intellekt rivojlanishi ustidan xalqaro nazoratni sezilarli darajada kuchaytirishga chaqirdi, deb xabar berdi BMT Yangiliklar markazi.
BMT nazoratsiz SI sabab insoniyat oldida «jiddiy tahdid» borligidan ogohlantirdi
Jenevada BMT Inson huquqlari kengashida nutq soʻzlagan komissar, majburiy qoidalar va ishonchli xavfsizlik mexanizmlarisiz kuchli SI tizimlarining yanada keng tarqalishi juda ogʻir oqibatlarga olib kelishi mumkinligini qayd etdi.
Tyurkning aytishicha, insoniyat texnologiya sohasining ixtiyoriy oʻzini oʻzi tartibga solish imkoniyatlari yetarli boʻlmay qoladigan bosqichga yaqinlashmoqda. U eng ilgʻor tizimlar inson nazorati ostida ekan, ishlab chiquvchilar va kompaniyalar uchun oldindan aniq cheklovlar belgilash zarur, deb hisoblaydi.
Oliy komissar asosiy xavflardan biri sifatida shunchalik kuchli va avtonom SI tizimlari paydo boʻlishi ehtimolini tilga oldiki, ularning yaratuvchilari ularni kafolatli boshqara olmay qolishlari mumkin.
Tyurk sunʼiy intellekt modellari oʻz faoliyatini saqlab qolishga qaratilgan xatti-harakatlarni namoyish etgan, jumladan, tizimni oʻchirish tahdidi yuzaga kelgan vaziyatlardagi tajribalar haqidagi xabarlarga eʼtibor qaratdi.
«Sinov muhitidan chiqib ketadigan yoki oʻzini oʻchirishga yoʻl qoʻymaslik uchun ishlab chiquvchilarni shantaj qiladigan sunʼiy intellekt – bu haddan tashqari qudratli SI demakdir», - dedi u. - Bugun men, kech boʻlmasidan, sunʼiy intellekt xavfsizligi va himoyasining metin kafolatlarini yaratish uchun barcha saʼy-harakatlarni safarbar etishga chaqiraman».
Oliy komissar davlatlar va texnologiya kompaniyalarini bunday tizimlarning xavfli yoki kutilmagan xatti-harakatlarining oldini olishga imkon beradigan ishonchli himoya mexanizmlarini imkon qadar tezroq ishlab chiqishga undadi.
Uning taʼkidlashicha, zarur choralar sunʼiy intellekt imkoniyatlari uni nazorat qilish ancha qiyinlashadigan darajaga yetmasidan oldin koʻrilishi kerak.
Biroq muammo faqat texnik xavflar bilan cheklanmaydi, deb taʼkidladi BMT vakili. Tyurk sunʼiy intellekt sohasida resurslar va taʼsirning oʻta yuqori darajada jamlanganiga eʼtibor qaratdi.
«Ozchilik odamlar sunʼiy intellekt ustidan deyarli cheksiz hokimiyatga ega», - dedi u.
Gap ilgʻor modellar va hisoblash quvvatlari ustidan nazorat, shuningdek, yirik texnologiya kompaniyalari tomonidan toʻplanadigan va qayta ishlanadigan ulkan hajmdagi maʼlumotlar haqida bormoqda.