Biya yuradi, qachondir yetib boradi

Oʻzbekiston va Yevropa Ittifoqi 30 sentyabr kuni Toshkentda Transkaspiy transport yoʻlagi boʻyicha ikkinchi milliy konferentsiyani oʻtkazadi. Uchrashuvda temir va avtomobil yoʻllariga investitsiyalar kiritish, logistikani rivojlantirish va xususiy biznesni jalb etish masalalari muhokama qilinadi. Bu haqda YEIning Oʻzbekistondagi Delegatsiyasi matbuot xizmati xabar berdi.

Konferentsiya tashkilotchilari sifatida Oʻzbekiston Transport vazirligi va Yevropa komissiyasining Xalqaro hamkorlik boʻyicha bosh direktoriyati ishtirok etadi. Tadbirda davlat organlari, xalqaro moliya institutlari, transport va logistika kompaniyalari vakillari qatnashadi.

Ishtirokchilar Markaziy Osiyo va Yevropa oʻrtasidagi yoʻnalishda Oʻzbekiston uchun ustuvor boʻlgan loyihalarni koʻrib chiqadilar. Yoʻllarni rivojlantirish va chegara tartib-taomillaridan tashqari, kun tartibiga logistika tarmogʻi, savdo va transport hujjatlarini raqamli formatga oʻtkazish hamda xususiy biznesni jalb qilish masalalari kiritilgan.

Konferentsiya YEI tomonidan Global Gateway strategiyasi doirasida moliyalashtiriladigan Transkaspiy transport yoʻlagi Muvofiqlashtiruvchi platformasi doirasida boʻlib oʻtadi. Platforma yoʻnalishdagi investitsiyalar va islohotlarni muvofiqlashtirish uchun Markaziy Osiyoning beshta davlati, Yevropa Ittifoqi, xalqaro moliya institutlari va boshqa hamkorlarni birlashtiradi.