Birinchi qavatlardagi biznesni xonadonlarni noturar joy fondiga oʻtkazish talabidan ozod qilmoqchi boʻlishyapti

Biznesni birinchi qavatlardagi turar joylarni noturar joy toifasiga oʻtkazmasdan tashkil etishga ruxsat berish taklif etilmoqda

Oʻzbekistonda koʻp kvartirali uylarning birinchi qavatlarida biznes yuritish qoidalarini oʻzgartirish taklif etildi. Tadbirkorlarga turar joylarni noturar joy toifasiga oʻtkazmasdan, u yerda ayrim turdagi savdo va xizmat koʻrsatish shoxobchalarini joylashtirishga ruxsat berish rejalashtirilmoqda. Buning uchun faqatgina xabarnoma yuborish kifoya boʻlishi nazarda tutilgan.

Prezident matbuot xizmatining xabar berishicha, gap sartaroshxonalar, goʻzallik salonlari, kichik doʻkonlar, atelyelar, poyabzal va maishiy texnika taʼmirlash ustaxonalari haqida bormoqda.

Hozirgi vaqtda birinchi qavatdagi kvartiradan bunday faoliyat uchun foydalanmoqchi boʻlgan tadbirkorlar xonadonni turar joy fondidan noturar joy fondiga oʻtkazishlari shart. Buning uchun kelishish va ruxsatnomalar olish tartib-taomillari koʻzda tutilgan.

Yangi tartib muayyan biznes turlari uchun ushbu tartib-taomildan voz kechish imkonini berishi kerak. Bunda ruxsat etilgan xizmatlarning aniq roʻyxati va xavfsizlik talablari hali belgilanishi lozim.

Mutasaddilarga bir oy muddatda tegishli roʻyxatni ishlab chiqish, shuningdek, bino va inshootlar javob berishi kerak boʻlgan talablarni belgilash topshirildi.