«Birgalikda biz suveren davlatlar boʻlib qolish uchun zarur boʻlgan resurslar va sherikliklarni taʼminlay olamiz» — Marko Rubio
AQSh va Markaziy Osiyoning birgalikdagi ishi mamlakatlarga suveren boʻlib qolishga va umumiy farovonlikni oshirishga yordam beradi, dedi Marko Rubio. Hamkorlik yoʻnalishlari orasida u Transkaspiy yoʻnalishi, oʻta muhim minerallar va texnologik sektor uchun mutaxassislar tayyorlashni tilga oldi.
«Birgalikda biz suveren davlatlar boʻlib qolish uchun zarur boʻlgan resurslar va sheriklikni taʼminlay olamiz» — Marko Rubio
Markaziy Osiyo mamlakatlari suverenitetni saqlab qolish va umumiy farovonlikni oshirish uchun zarur boʻlgan resurslar, investitsiyalar va savdo sherikliklarini birgalikda taʼminlashga qodir. Bu haqda AQSh davlat kotibi Marko Rubio mintaqa mamlakatlari va AQSh tashqi ishlar vazirlarining C5+1 formatidagi uchrashuvida soʻzlagan nutqida maʼlum qildi.
«Birgalikda biz mamlakatlarimizga har bir davlatimiz suveren boʻlib qolishi va umumiy farovonligimizni birgalikda oshirishimiz uchun zarur boʻlgan resurslar, investitsiyalar, imkoniyatlar va savdo sherikliklarini taʼminlay olamiz», — dedi u.
Uning soʻzlariga koʻra, C5+1 «faqat Amerikaning Markaziy Osiyo mamlakatlari bilan yaqinroq, tinchliksevar munosabatlarga boʻlgan qiziqishinigina emas, balki uning shunday munosabatlarni rivojlantirishga sodiqligini ham aks ettiradi».
Marko Rubio AQSh oʻz sanoati va yetkazib berish zanjirlari xavfsizligidan manfaatdor ekanini taʼkidladi.
«Biz Qoʻshma Shtatlarda suveren, mustaqil iqtisodiyotga ega mustaqil mamlakat boʻlib qolish va hech qachon ishonchsiz xorijiy sheriklar yoki hatto raqiblarga qaram boʻlib qolmaslik uchun muhim sanoat tarmoqlarimiz va ularni qoʻllab-quvvatlovchi yetkazib berish zanjirlari xavfsizligini taʼminlashga intilamiz», — dedi u.
«Markaziy Osiyo investitsiyalar va eksport uchun ideal joy — barcha mamlakatlar kelajagi uchun hayotiy muhim boʻlgan materiallar yetkazib beriladigan markaziy tugundir», — deya taʼkidladi Marko Rubio.
Amaliy hamkorlik yoʻnalishlari haqida gapirganda, AQSh davlat kotibi transport infratuzilmasini, muhim minerallarni yetkazib berish zanjirlarini rivojlantirish va mutaxassislarni tayyorlashni tilga oldi.
«Biz Transkaspiy savdo yoʻnalishi infratuzilmasini takomillashtiramiz va sheriklarimizga AQSh va Markaziy Osiyo bozorlariga chiqish uchun koʻproq imkoniyatlar taqdim etamiz», — dedi u.
«Biz muhim minerallar boʻyicha muloqot doirasida yuqori qoʻshilgan qiymatga ega integratsiyalashgan yetkazib berish zanjirlarini rivojlantirish orqali energetik kelajagimizni taʼminlash ustida ishlaymiz. Biz Markaziy Osiyoning oʻsib borayotgan texnologiya sektorida ilgʻor Amerika texnologiyalaridan foydalanish va ularni texnik qoʻllab-quvvatlash uchun minglab yosh mutaxassislarni tayyorlaymiz», — deya davom etdi AQSh davlat kotibi.
Uning soʻzlariga koʻra, «B5+1» biznes-forumi orqali oʻzaro savdo va investitsiyalarni sezilarli darajada oshirish uchun davlat va biznes oʻrtasidagi muloqotga koʻmaklashish rejalashtirilmoqda.
Marko Rubio, shuningdek, oʻzi ishtirok etgan Vashingtondagi oʻtgan yilgi «C5+1» uchrashuvini eslatib oʻtdi.
«Oq uydagi ushbu yagona uchrashuvning oʻzi 25 milliard dollarlik yangi bitimlarni keltirdi, bu bitimlar transport, energetika va moliya sektorlarimizni, shuningdek, iqtisodiyotlarimizning boshqa eng muhim asoslarini mustahkamladi», — dedi u.
Uning soʻzlariga koʻra, AQSh prezidenti Donald Tramp va Markaziy Osiyo mamlakatlari yetakchilari oʻshanda savdo va investitsiyalarni kengaytirishga yordam beradigan tartibga solish muhiti va mehnat bozori sharoitlarini shakllantirish majburiyatini olgan edilar. Bu haftadagi uchrashuvlar ushbu kelishuvlarni vaqtida bajarishga qaratilgan.
«Bu hafta bu yerda yigʻilgan barcha mamlakatlar — oʻz madaniyati va manfaatlariga ega boʻlgan oʻziga xos, suveren, mustaqil davlatlardir. Ularning har biri oʻz taqdirini oʻzi belgilaydi», — deya taʼkidladi Marko Rubio.
«Biz Qoʻshma Shtatlarda ularning mustaqil davlatlar sifatida gullab-yashnashini xohlaymiz. Biz bu yoʻlda ularning sherigi boʻlishni xohlaymiz», — deya xulosa qildi u.