Birdamlik namoyishi
Oʻzbekiston harbiylari Turkiya va Ozarbayjon bilan oʻtkazilgan mashgʻulotlarda dronlar bilan zarba berish va mudofaani shturm qilishni mashq qildilar
**Birlik namoyishi**
Oʻzbekiston, Ozarbayjon va Turkiya harbiy xizmatchilari «Birlik kuchi — 2026» keng koʻlamli qoʻshma oʻquv mashgʻulotlarini oʻtkazdilar. Manevrlar Qorabogʻ iqtisodiy rayonidagi «Gizilgaya», Naxchivon Muxtor Respublikasidagi «Qorabogʻlar» oʻquv markazlarida, shuningdek, Kaspiy dengizining Ozarbayjon akvatoriyasidagi «Byoyuk Zirya» oʻquv poligonida boʻlib oʻtdi.
Mashgʻulotlarda uch mamlakatning 3,5 mingdan ortiq harbiy xizmatchisi ishtirok etdi. Harbiylar zamonaviy tahdidlar: uchuvchisiz uchish apparatlari hujumlari, radioelektron kurash, kiberhujumlar, dezinformatsiya, togʻli hududlardagi operatsiyalar va egallab olingan obʼyektlarni ozod qilish sharoitlarida harakat qilishni mashq qildilar.
Manevrlarda uchuvchisiz uchish apparatlarini qoʻllashga alohida eʼtibor qaratildi. «Gizilgaya» poligonida 130 dan ortiq dron, 70 dan ortiq zirhli texnika, 90 dan ortiq artilleriya tizimi va 20 dan ortiq aviatsiya vositasi jalb etildi.
Harbiylar dronlar toʻdasining hujumlarini qaytarish, havo razvedkasini olib borish, shartli hujum qilayotgan kolonnalarga zarbalar berish, shuningdek, oʻq-dorilar va taʼminot vositalarini yetkazib berish uchun uchuvchisiz uchish apparatlaridan foydalanishni mashq qildilar. Boʻlinmalar, shuningdek, mudofaa chiziqlarini yorib oʻtish, minalardan tozalash va zirhli texnikalarni oldinga siljitish ustida ishladilar.
Manevrlar davomida harbiy xizmatchilar kiberhujumlar va dezinformatsiya tarqatilishiga chora koʻrishni, shuningdek, uchuvchisiz uchish apparatlaridan foydalangan holda chegarani noqonuniy kesib oʻtishga boʻlgan urinishlarning oldini olishni ham oʻrgandilar.
Alohida epizodlar Kaspiy dengizida boʻlib oʻtdi. Harbiylar egallab olingan kema va shelfdagi obʼyektni ozod qilish, garovga olinganlarni qutqarish va desant tushirishni mashq qildilar.
Shu tariqa, Oʻzbekiston Ozarbayjon va Turkiya qurolli kuchlari bilan bir vaqtning oʻzida bir nechta yoʻnalishlarda — uchuvchisiz uchish apparatlarini qoʻllash va quruqlikdagi operatsiyalardan tortib, dengiz va axborot muhitidagi harakatlargacha boʻlgan hamkorlikni amalda sinab koʻrdi.
Oʻzbekiston Mudofaa vaziri, general-leytenant Shuhrat Xolmuhamedov shaxsiy tarkib «yuqori jangovar shaylik darajasi»ni va qoʻyilgan vazifalarni birgalikda bajarish qobiliyatini namoyish etganini taʼkidladi.
Manevrlarni kuzatuvchi sifatida Qirgʻiziston, Pokiston, Serbiya, Slovakiya, Tojikiston, Gruziya, Turkmaniston, BAA va Eron vakillari kuzatib bordilar.
«Birlik kuchi — 2026» oʻquv mashgʻulotlari Oʻzbekiston, Ozarbayjon va Turkiya qurolli kuchlari ishtirokidagi bunday keng koʻlamli ilk qoʻshma manevrlar boʻldi.