Berlin Senati tizimlariga hakerlar hujum qildi
Germaniya poytaxti Berlin hukumatining shaharsozlik hamda transport va atrof-muhit masalalari bilan shug‘ullanuvchi ikki idorasi hakerlik hujumiga uchradi. Xavfsizlik chorasi sifatida ular Berlinning umumiy raqamli tarmog‘idan uzib qo‘yilgan. OAV ma’lumotlariga ko‘ra, hujum vaqtida o‘ta muhim va maxfiy ma’lumotlarning bir qismi o‘g‘irlangan bo‘lishi mumkin.
Berlin federal yeri hukumati, ya’ni Senat tarkibidagi ikki idora kiberhujumga uchradi. Bu haqda 17-avgust kuni Berlin Senati kanselyariyasi xabar berdi.
Rasmiylarning ma’lum qilishicha, tizimga buzib kirishga urinish raqamli-kriminalistik ekspertiza o‘tkazilayotgan vaqtda aniqlangan. Hujum Berlinning shaharsozlik, qurilish va uy-joy masalalari bo‘yicha idorasiga, shuningdek, mobillik, transport, atrof-muhit va iqlimni muhofaza qilish masalalari bo‘yicha idorasiga ta’sir ko‘rsatgan.
Germaniyaning rbb teleradiokompaniyasi xabariga ko‘ra, xavfsizlikni ta’minlash maqsadida har ikki idora 14-avgust kuni Berlin federal yerining raqamli tarmog‘idan uzib qo‘yilgan. Hozircha kiberhujum aynan 14-avgust kuni sodir bo‘lgani yoki rasmiylar uni shu kuni aniqlagani ochiqlanmagan.
Berlin Senati kanselyariyasi hujumga uchragan har ikki idora o‘z faoliyatini davom ettira olayotganini bildirgan. Biroq rbb ma’lumotiga ko‘ra, 14-avgust kechqurunidan boshlab ular internetdan butunlay uzilgan. Ayni paytda idoralar bilan asosan telefon orqali bog‘lanish mumkin. Xodimlarga masofadan, ya’ni uydan turib ishlash imkoni yo‘qligi ham ma’lum qilingan.
Dastlabki ma’lumotlarga ko‘ra, hujumchilar Berlin federal yeri raqamli tarmog‘iga kirish uchun shaharsozlik, qurilish va uy-joy masalalari idorasining raqamli infratuzilmasidagi zaiflikdan foydalangan bo‘lishi mumkin. Rbb aniqlashicha, kiberhujumdan zarar ko‘rgan ikki idora raqamli infratuzilmaning muayyan qismidan birgalikda foydalangan. Shu bilan birga, ular Berlin federal yeri tarmog‘idagi o‘z segmentlarini mahalliy IT xizmatlarini ko‘rsatuvchi ITDZ kompaniyasining bevosita ishtirokisiz boshqarib kelgan.
Rbb manbalarining bildirishicha, kiberhujum oqibatida «qisman o‘ta muhim va maxfiy ma’lumotlar» o‘g‘irlangan. Biroq qanday ma’lumotlar qo‘lga kiritilgani va ularning hajmi haqida hozircha batafsil axborot berilmagan. Berlin Senati matbuot kotibi Kristine Rixter Tagesspiegel nashri so‘roviga javoban tergov ishlari davom etayotganini bildirish bilan cheklangan.
Berlin Senati matbuot xizmati ma’lumotiga ko‘ra, hodisa yuzasidan Berlin jinoiy ishlar idorasi, shahar prokuraturasi va Germaniya Axborot xavfsizligi federal idorasi (BSI) ish olib bormoqda. Ular Berlin federal yerining raqamli tarmog‘i xavfsizligini ta’minlash va ehtimoliy zaifliklarni bartaraf etish ustida ishlamoqda.
17-avgust kuni xavfsizlik choralarini muvofiqlashtirish va raqamli-kriminalistik ekspertizani tashkil etish maqsadida maxsus inqiroz shtabi ham tuzilgan. Unga Berlin federal yerining axborot xavfsizligi bo‘yicha mas’ul vakili rahbarlik qilmoqda. Hozircha kiberhujum ortida kim turgani ma’lum emas. Berlin Senati kanselyariyasi tergovning ushbu bosqichida ehtimoliy hujumchilar yoki ularning qaysi davlat yoki guruhga aloqadorligi haqida taxmin bildirmagan.