Bentley oʻzining ilk toʻliq elektrli avtomobilini taqdim etdi
Yoʻltanlamaslar Kryudagi yangi ishlab chiqarish liniyasida yigʻiladi, bu yer 1946 yildan beri Bentley kompaniyasining bazasi boʻlib kelgan.
Bentley Cheshirdagi zavodini modernizatsiya qilish uchun 350 million funt sterling sarflaganidan soʻng, oʻzining ilk toʻliq elektrlashtirilgan avtomobilini taqdim etdi.
Torcal yoʻltanlamasi (SUV) hashamatli avtomobillar ishlab chiqaruvchisining 1946 yildan beri bosh qarorgohi boʻlib xizmat qilayotgan ushbu hududdagi yangi ishlab chiqarish liniyasida yigʻiladi.
Biznes masalalari boʻyicha kotib Jonatan Reynoldsning taʼkidlashicha, ushbu investitsiya «Kru (Crewe) shahridagi 4000 ta yuqori daromadli mahalliy ish oʻrinlarini qoʻllab-quvvatlaydi».
Biznes, innovatsiyalar, fan va savdo vazirligining maʼlum qilishicha, Torcal avtomobilsozlik taʼminot zanjirini mustahkamlaydi, chunki Bentley kompaniyasiga 700 dan ortiq korxona, jumladan, uning bazasidan 50 mil radiusda joylashgan 82 ta korxona butlovchi qismlar yetkazib beradi.
Ushbu eʼlon Buyuk Britaniya avtomobil sanoati jiddiy qiyinchiliklarga duch kelayotgan, xususan, yaqinda JLR yirik hajmdagi ish oʻrinlarini qisqartirishini eʼlon qilgan va ishlab chiqaruvchilar oʻz biznesini rivojlantirishning yangi yoʻllarini izlayotgan bir paytda yangradi.
Sanoatning kelajagini taʼminlash maqsadida yangi elektr modellari eʼlon qilinayotgan boʻlsa-da, toʻliq elektromobillar kelajagiga oʻtishni sekinlashtirish boʻyicha chaqiriqlar ham yangramoqda.
Bentley kompaniyasining bildirishicha, Torcal’ning 113 kVt/soat quvvatga ega batareyasi 375 milgacha (600 km) masofani bosib oʻtishni taʼminlaydi va 400 kVt quvvatli quvvatlagich yordamida 20 daqiqadan kamroq vaqt ichida 10 foizdan 80 foizgacha quvvat olishi mumkin.
Kompaniyaning qoʻshimcha qilishicha, Torcal S modeli soatiga 162 mil maksimal tezlik bilan uning hozirgacha boʻlgan eng kuchli avtomobili, shuningdek, 0 dan 60 milgacha tezlikni 2,8 soniyada oladigan eng tezkor mashinasi boʻladi.
Standart Torcal modeli soatiga 155 mil tezlikka erisha oladi va 0 dan 60 milgacha tezlikni 3,3 soniyada oladi.
Avtomobil salonida charm, jun va alyuminiy kabi materiallardan foydalanilgan.
Bentley raisi va bosh ijrochi direktori doktor Frank-Shteffen Vallizer Torcal modelini «tarixdagi eng yaxshi Bentley’lardan biri» deb taʼrifladi va u hashamatni elektr texnologiyasi bilan birlashtirish uchun yaratilganini aytdi.
«Torcal — bu, eng avvalo, oʻz ishiga befarq boʻlmagan insonlar tomonidan qoʻlda yaratilgan, merosni ilgʻor innovatsiyalar bilan uygʻunlashtirish uchun mavjud boʻlgan eng yaxshi materiallar va texnologiyalardan foydalanilgan haqiqiy Bentley’dir», dedi u.
Yangi Bentley alyuminiy qoplamaga ega.
Yangi ishlab chiqarish liniyasi Kru hududidagi 1938 yilga oid tarixiy zavod binolaridan birining ichida joylashgan.
Bir paytlar u yerda kompaniyaning mexanik ishlov berish tsexi, keyinchalik esa tadqiqot va ishlanmalar ustaxonasi joylashgan edi. Hozirda bino toʻliq tozalanib, avtonom boshqariladigan transport vositalariga avtomobillarni ishlab chiqarish jarayoni boʻylab harakatlantirish imkonini beruvchi yangi pol bilan jihozlandi.
Reynolds Bentley’ning 350 million funt sterlinglik investitsiyasini McLaren tomonidan eʼlon qilingan 500 million funt sterling va Nissan’ning 170 million funt sterlinglik sarmoyasidan soʻng, Britaniya avtomobil sanoati uchun «atigi yetti kun ichidagi uchinchi gʻalaba» deb atadi.
Hukumatning maʼlum qilishicha, u 2030 yildan boshlab yangi benzin va dizel dvigatelli avtomobillar sotuvini toʻxtatish rejasi bilan elektromobillarga oʻtishni qoʻllab-quvvatlash uchun 7,5 milliard funt sterling sarmoya kiritmoqda.