BBC maxfiy ravishda ozod etilganini fosh qilganidan keyin, oʻquvchiga nisbatan jinsiy zoʻravonlik qilgan oʻqituvchi Indoneziya qamoqxonasiga qaytarildi

Oʻquvchiga nisbatan jinsiy zoʻravonlik qilgan oʻqituvchi BBC uning yashirincha ozod etilganini fosh qilganidan keyin Indoneziya qamoqxonasiga qaytarildi

Oʻquvchi qizga nisbatan jinsiy zoʻravonlik qilgan sobiq oʻqituvchi, BBC surishtiruvi uning yashirincha muddatidan oldin ozod qilinganini fosh etganidan soʻng, Indoneziyada qaytadan qamoqxonaga yuborildi.

Bechi nomi bilan tanilgan Mochamad Subchi Azal Tsani 2022 yilda Sharqiy Yavadagi otasiga tegishli mashhur islom internat-maktabida (u yerda oʻqituvchi boʻlib ishlagan) oʻquvchi qizga jinsiy zoʻravonlik qilganlikda aybdor deb topilib, yetti yillik qamoq jazosiga hukm qilingan edi.

BBC Eye yashirin surishtiruvi shuni aniqladiki, u jazo muddatining yarmidan kamini oʻtaganidan keyin, 2025 yil avgust oyida shartli ravishda ozodlikka chiqarilgan. U zoʻravonlik qilganlikda ayblangan ayolga, xabardor qilinish boʻyicha qonuniy huquqqa ega boʻlishiga qaramay, bu haqda aytilmagan.

U sobiq oʻqituvchining yana panjara ortiga qaytganini bilganida, yengillikdan yigʻlab yubordi.

«Men bunday holat boshqa hech kimning boshiga tushmasligini va bundan buyon Indoneziyada qonunlar adolatli qoʻllanilishini soʻrab duo qilaman», dedi ismi sir qolishini soʻragan sobiq oʻquvchi BBC’ga.

Immigratsiya va jazoni ijro etish vazirligi avvalroq BBC’ga Bechining qoidalarga muvofiq berilgan jazo muddatini qisqartirishlar tufayli ozod qilinganini aytgan edi.

Biroq, BBC surishtiruvi jamoatchilik gʻazabini qoʻzitib, qonun chiqaruvchilarni tekshiruv oʻtkazishga chaqirishga undadi, shundan soʻng hukumat toʻliq qayta koʻrib chiqishni eʼlon qildi.

Ushbu qayta koʻrib chiqish natijasida Bechining shartli ozod etilishiga olib kelgan «xatolar» aniqlandi. Endi u qamoqxonaga qaytarildi.

Immigratsiya va jazoni ijro etish vaziri Agus Andrianto BBC’ga Bechining shartli ozod etilishini maʼqullaganlar «albatta sanktsiyalarga duch kelishini» aytdi.

«Biz bunday xatolar yoki qonunbuzarliklar boshqa takrorlanmasligini taʼminlamoqchimiz», dedi u.

Bechini zoʻrlashda ayblagan bir necha ayollardan biri Ira Puspitasari (oʻngda) bu xabarni eshitib «hayratda qolganini» aytdi

Bechini jinsiy zoʻravonlikda ayblagan va uning sudida koʻrsatma bergan bir necha sobiq oʻquvchilardan biri Ira Puspitasari uchun bu qaror adolat qaror topganini anglatadi.

«Men haqiqatan ham hayratdaman. Hukumat bu ishga bunchalik batafsil eʼtibor qaratishini va biz jabrlanuvchilarga haqiqatan ham eʼtibor berishini kutmagandim», dedi u.

Anonimlik boʻyicha qonuniy huquqidan voz kechgan Ira BBC’ga Bechi uni 15 yoshidan boshlab toʻrt yildan koʻproq vaqt davomida zoʻrlagani va jinsiy zoʻravonlik qilganini aytdi.

«Menga uning qulidek munosabatda boʻlishdi. Meni asirlikda ushlab turishdi, zoʻrlashdi, kaltaklashdi», dedi u.

Uning aytishicha, u qochishga harakat qilgan, biroq Bechining shaxsiy qoʻriqchilari uni topib, oʻgʻirlab ketishgan va chekkadagi kulbaga olib borishgan, u yerda Bechi uni qiynagan va zoʻrlagan.

U hamma narsani politsiyaga xabar qilganini, ammo keyin shikoyatini qaytarib olish uchun bosimga uchraganini aytdi. U shuningdek, Bechining onasi unga «hech narsa boʻlmaganini» aytishni buyurgan audioyozuvni ham taqdim etdi.

Mart oyida, u hali qamoqda boʻlishi kerak boʻlgan vaqtda, Bechining tadbirda tabassum qilib, tarafdorlari bilan salomlashayotgani aks etgan BBC’ning yashirin tasvirlarini koʻrgach, Ira koʻz yoshlarini tiya olmadi.

«Goʻyo hech narsa boʻlmagandek», dedi u.

Ira shu hafta BBC surishtiruviga javoban diniy va taʼlim muassasalarida jinsiy zoʻravonlik holatlari davlat tomonidan qanday hal qilinishi boʻyicha oʻtkazilgan parlament eshituviga taklif qilindi.

Taʼlim muassasalaridagi zoʻravonlikning bir necha qurbonlarini himoya qilgan advokat Joko Jumadi ham eshituvda soʻzga chiqib, rasmiylar koʻpincha zoʻravonlik haqidagi ayblovlarni tekshirishni istamasliklarini, chunki ular «katta izdoshlariga ega boʻlgan nufuzli diniy arboblar» bilan bogʻliq ekanligini aytdi.

U eshituvda bunday ishlarni oʻz zimmasiga olgani uchun muntazam ravishda tahdid va qoʻrqitishlarga duch kelganini aytdi.

Bechi Sharqiy Yavaning Jombang shahridagi «Shiddiqiya» islom internat-maktabi asoschisi, taniqli islom ulamosi Muhammad Muxtor Muʼtining oʻgʻlidir.

U 2022 yilda, tarafdorlari uni hibsga olinishiga yoʻl qoʻymaslik uchun toʻplangan maktabda politsiyaning 15 soatlik qamalidan keyin hibsga olingan edi.

Prokurorlar Bechi bir necha oʻquvchi tomonidan zoʻrlashda ayblanganidan keyin uzoqroq muddatga ozodlikdan mahrum qilishni soʻrashgan edi, biroq u zoʻrlash ayblovlari boʻyicha oqlandi va bir oʻquvchiga nisbatan jinsiy zoʻravonlik qilish kabi yengilroq jinoyatda aybdor deb topildi.

BBC oʻz surishtiruvi davomida Bechi, uning onasi va «Shiddiqiya» internat-maktabidan izoh olishga harakat qildi, biroq hech qanday javob olmadi.