«Bavariya» «Arsenal»ni yengolmadi, «Real»da yirik gʻalaba
Chorshanba oqshomida YeChLning 3-turi doirasida oʻtkazilgan oʻyinlar, gollar va turnir jadvalidagi vaziyat.
«Bavariya» «Arsenal»ni yenga olmadi, «Real» esa yirik gʻalabaga erishdi
«Bavariya» – «Arsenal» 2:2
Gollar:
Eze, 25 (0:1). Deyvis, 35 (1:1). Keyn, 61 – penalti (2:1). Rays, 82 (2:2)
«Bavariya»: Noyer, Upamekano, Kim Min Je (Ta, 46), Stanishich, Laymer, Bishof, Pavlovich, Saybari (Karl, 68), Deyvis (Braun, 85), Gnabri (Dias, 68, Sapoko Ndiay, 90), Keyn
«Arsenal»: Rayya, Gabriel Magalyaysh, Konsa, Kalafiori, Timber, Gimaraysh (Lyuis-Skelli, 69), Rays, Edegor (Merino, 85), Madueke, Saka (Eze, 10), Havers (Yokeresh, 68)
Vensan Kompani kutilmaganda ancha ehtiyotkor taktika tanladi: Luis Diasni zaxirada qoldirib, ko‘proq himoyaviy vazifani bajaradigan Stanishichni maydonga tushirdi. «Bavariya» oldingi chiziqda yuqori pressingdan voz kechib, qarshi hujumlarga tayanishni ma’qul ko‘rdi.
Londonliklar uchrashuv boshidayoq hujumdagi asosiy futbolchilaridan biri Bukayo Sakani yo‘qotdi. O‘ng qanot vingeri jarohatni maydonda oldi — o‘yindan keyingi xabarlarga ko‘ra, futbolchi dekabrgacha safga qaytmasligi mumkin.
Arteta Sakaning o‘rniga Eberechi Ezeni tushirdi va aynan u 25-daqiqada «Arsenal»ni hisobda oldinga olib chiqdi. Martin Edegor maydonning ikkinchi qismidan turib to‘pni himoyachilar ortiga uzatdi, Eze ofsayd chizig‘ida harakat qilib bu pasga yetib bordi va Manuel Noyerni bemalol dog‘da qoldirdi.
10 daqiqa o‘tgach, «Bavariya» javob qaytardi. Butun o‘yin davomida orqaroqda o‘ynagan Harri Keyn ham Edegornikiga o‘xshash ideal pas berdi. Himoya chizig‘ini yorib o‘tgan to‘pga Alfonso Devis yetib bordi va David Rayyaga hech qanday imkon qoldirmadi.
Ikkinchi bo‘limda mezbonlar hujumkor futbolga o‘tib, raqibni jarima maydoniga qamab qo‘ya boshladi. Bu o‘z samarasini berdi: Keynning zarbasidan so‘ng to‘p yo‘lini to‘sishga uringan Yurrien Timberning qo‘li havoda qolib ketdi va penalti belgilandi. Harri 11 metrlik nuqtadan aniq zarba berdi — 2:1.
Myunxenliklar shundan keyin ham hujum qilishda davom etdi, biroq ikkinchi bo‘limning ikkinchi yarmida charchab qoldi. Shundan so‘ng «Arsenal» o‘yin nazoratini qo‘lga oldi, Artetaning almashtirishlari bu safar ham o‘zini oqladi va hisob tenglashdi. Mehmonlar bir necha daqiqa davomida raqibga nafas rostlash imkonini bermadi va bu bosim Raysning hisobni tenglashtirishi bilan yakunlandi — 2:2.