Avstriyada 14 yoshgacha boʻlgan bolalar maktabga qaytar ekan, islomiy roʻmol taqishga qoʻyilgan taqiq kuchga kirdi

Avstriyada 14 yoshgacha boʻlgan qizlar maktabga qaytar ekan, islomiy roʻmol taqish taqiqi kuchga kirdi

Avstriyada yangi oʻquv yili boshlanishi bilan maktablarda 14 yoshgacha boʻlgan qizlarning roʻmol oʻrashini taqiqlovchi qonun kuchga kirdi.

Qonun butun mamlakat boʻylab davlat va xususiy maktablarda «anʼanaviy musulmon» bosh kiyimlarini, jumladan, hijob va burqalarni taqiqlaydi.

Konservativ Xalq partiyasi (ÖVP) vakili, Integratsiya vaziri Klaudiya Bauerning aytishicha, roʻmol «zulm belgisi va qizlarni goʻdaklikdan nazorat qilish vositasidir».

Biroq, tanqidchilarning taʼkidlashicha, yangi qonun mamlakatda antimusulmon kayfiyatini kuchaytirmoqda va konstitutsiyaga zid boʻlishi mumkin.

Ushbu chora uchta markazchi partiya: ÖVP, Sotsial-demokratlar (SPÖ) va liberal Neos koalitsiyasi tomonidan kiritilgan. Ular buni «gender tengligiga sodiqlikning aniq ifodasi» deb taʼriflamoqda va bu yosh qizlarning huquqlarini himoya qilishga qaratilganini aytmoqda.

Avstriya Islom jamiyati (IGGÖ) vakili Karla Amina Bagajati BBC’ga tashkilot «taqiqqa qatʼiy qarshi» ekanini aytdi.

«Biz bu din erkinligiga boʻlgan asosiy huquqni asossiz ravishda cheklaydi va musulmon qizlarga nomutanosib ravishda taʼsir qiladi, deb hisoblaymiz», dedi u.

«Bolalarni himoya qilish oʻrniga, u muayyan diniy amaliyotni nishonga oladi va oʻzi qoʻllab-quvvatlashini daʼvo qilayotgan bolalarni chetlashtirish xavfini tugʻdiradi».

IGGÖ «oʻzlarining asosiy huquqlari buzilayotganini his qilgan» va oʻz ishlarini Konstitutsiyaviy sudga topshirmoqchi boʻlgan qizlar va ularning oilalari tomonidan beriladigan huquqiy daʼvolarni qoʻllab-quvvatlashini bildirdi.

Sud 2020 yilda boshlangʻich maktablarda roʻmol taqishga qoʻyilgan avvalgi taqiqni bekor qilib, bu Avstriyaning diniy betaraflik tamoyilini buzadi, deb qaror qilgan edi.

Oʻqituvchilar roʻmol oʻragan bolani koʻrsalar, oʻquvchi va uning qonuniy vasiylari bilan bir qator suhbatlar oʻtkazish orqali yangi taqiqni ijro etishlari kutilmoqda.

Agar qoida qayta-qayta buzilsa, bolalar masalalari boʻyicha xizmatlarga xabar berilishi kerak va oxirgi chora sifatida vasiylar 800 yevrogacha (685 funt sterling) jarimaga tortilishi mumkin.

Baʼzi oʻqituvchilar taqiqning bajarilishi uchun masʼul boʻlishdan xavotir bildirishdi.

Yashillar partiyasi vakili Sigi Maurer liberal NEOS partiyasidan boʻlgan Taʼlim vaziri Kristof Viderkerni «yangi nizolar keltirib chiqarish va ularni oʻqituvchilar zimmasiga yuklash»da aybladi.

Uning soʻzlariga koʻra, oʻqituvchilar «onsiz ham katta bosim ostida» va Viderker oʻz vazifalaridan tashqari ularga «politsiyachi rolini yuklamoqchi».

Muxolifatdagi oʻng qanot Ozodlik partiyasi (FPÖ) amaldagi taqiq yetarli emasligini aytmoqda. U maktablarda ham oʻquvchilar, ham oʻqituvchilar uchun roʻmol va yuzni yopib turuvchi kiyimlarni butunlay taqiqlashni talab qilmoqda.

FPÖ vakili Rikarda Berger «Avstriyada, ayniqsa, maktablarimizda siyosiy islomga oʻrin yoʻq»ligini aytdi.

Avstriya kantsleri, ÖVP rahbari Kristian Shtoker yaqinda Avstriyaning ORF jamoat teleradiokompaniyasiga bergan intervyusida «islomiy davlatda yashashni istamasligini» aytib, siyosiy islomni konstitutsiyaviy ravishda taqiqlashga chaqirdi.

Frantsiyada 20 yildan ortiq vaqtdan beri maktablarda har qanday yaqqol koʻzga tashlanadigan diniy ramzlarni, jumladan, roʻmol, salla va kipalarni taqish taqiqlangan.

Avstriya qonuni Frantsiya qonunchiligidan farq qiladi, chunki u aynan musulmon ayollar kiyadigan bosh kiyimlarini nishonga oladi.

Avstriya, Frantsiya, Belgiya va Daniya kabi bir qator boshqa Yevropa davlatlari qatori, jamoat joylarida yuzni toʻliq yopadigan kiyimlarni (niqob yoki burqa) taqiqlaydi.

Bagajatining aytishicha, IGGÖ butun Yevropa boʻylab «murakkab ijtimoiy muammolar kamchilik guruhlarga qaratilgan ramziy choralarga keltirib qoʻyilayotgan xavotirli tendentsiya»dan xavotirda.

«Bunday yondashuvlar siyosiy eʼtiborni jalb qilishi mumkin, ammo ular asosiy muammolarni kamdan-kam hollarda hal qiladi», dedi u.