Audit regulyatori Manchester City buxgalteriyasini tekshirmoqda
Rasmiy tergov boshlanmagan, ammo regulyator holat yuzasidan surishtiruv oʻtkazmoqda.
Audit nazorati organi "Manchester Siti" hisobotlarini tekshirmoqda
Buyuk Britaniyaning auditni tartibga solish organi "Manchester Siti"dagi buxgalteriya qoidabuzarliklari boʻyicha surishtiruvlarga bosh-qosh boʻlayotganini tasdiqladi.
Jamoalar palatasining biznes boʻyicha tanlov qoʻmitasiga yuborilgan xatda Moliyaviy hisobot kengashi (FRC) 30 sentyabrda Angliya va Uelsdagi Sertifikatlangan buxgalterlar institutidan ushbu masalaning "nazorat koʻrib chiqilishini" oʻz zimmasiga olganini maʼlum qildi.
Rasmiy tergov boshlangani yoʻq, ammo FRC ushbu holat boʻyicha surishtiruv olib bormoqda.
Bu qaror "Manchester Siti" mustaqil komissiya tomonidan 2009-10 va 2017-18 yilgi mavsumlar oraligʻida Premyer-liganing moliyaviy qoidalarini buzish, jumladan, klubning moliyaviy ahvolini sunʼiy ravishda 900 million funt sterlingdan ortiqroqqa oshirib koʻrsatish bilan bogʻliq barcha ayblovlar boʻyicha aybdor deb topilganidan keyin qabul qilindi. "Siti" ushbu qaror ustidan shikoyat qilmoqda.
FRC qoidabuzarlik dalillarini aniqlagan taqdirda, sanktsiyalar qoʻllash uchun koʻproq resurslarga va kengroq vakolatlarga ega. U odatda roʻyxatga olingan ommaviy kompaniyalar kabi yirik tashkilotlardagi buxgalteriya standartlarini nazorat qiladi, lekin futbol klublarini emas.
FRC "Manchester Siti" auditorlari boʻlmish BDO kompaniyasining xatti-harakatlarini tekshirib, audit qoidalarga muvofiq amalga oshirilganini aniqlashi mumkin.
Shuningdek, agar "Etihad" klubining direktorlari yoki xodimlari kabi shaxslar professional buxgalteriya tashkilotlariga aʼzo boʻlsa, ularga nisbatan ham sanktsiyalar qoʻllashi mumkin.
BDO Buyuk Britaniyadagi beshinchi eng yirik buxgalteriya firmasi hisoblanadi, ammo oʻzini futbol sohasida bozor peshqadami deb ataydi va boshqa har qanday firmaga qaraganda koʻproq Premyer-liga va Chempionship klublariga maslahat beradi.
"Manchester Siti" ishini koʻrib chiqqan mustaqil komissiya klub aktsiyadorlari tomonidan kiritilgan mablagʻlarning kelib chiqishini yashirish uchun foydalanilgan sxema boʻyicha oʻz auditorlarida "janglish taassurot" uygʻotganini va auditorlar ushbu sxemadan "xabardor boʻlmaganini" aniqladi.
"Manchester Siti" vakillari komissiya qarori ustidan shikoyat qilishlarini aytib, unda "qonun, printsip va faktlar boʻyicha jiddiy xatoliklar mavjudligini hamda u ishonchsiz ekanini" taʼkidladilar.
Biznes boʻyicha tanlov qoʻmitasi raisi Liam Byorn FRC'ga shunga oʻxshash holatlarni tekshirish uchun kengroq vakolatlar berishga chaqirdi.
U X ijtimoiy tarmogʻida shunday deb yozdi: "Tartibga soluvchi organning xati uning klubdan dalillarni talab qilib olish va uning intizomiy qoidalari doirasiga kirmaydigan direktorlarni javobgarlikka tortish imkoniyatlarida boʻshliqlar borligini koʻrsatadi.
Bu kompaniyalar va direktorlarni javobgarlikka tortish uchun mavjud boʻlgan vakolatlar boʻyicha jiddiy savollarni keltirib chiqaradi.
Hukumat ushbu boʻshliqlarni yopishga qaratilgan islohotlar nega bekor qilinganini va endi javobgarlikni kuchaytirish uchun nima qilinishini tushuntirib berishi shart".