Arizona kongressiga nomzod saylovoldi tashviqoti belgisini taʼmirlayotganda zoʻrlanganini aytdi

Arizona kongressiga nomzod saylovoldi tashviqoti belgisini taʼmirlayotganda zoʻrlanganini aytdi

Arizona kongressiga nomzod oʻz okrugida tunda saylovoldi tashviqoti belgilarini taʼmirlayotganda avtoturargohda zoʻrlanganini maʼlum qildi.

Demokrat Bernadett Grin-Plasentiya , external nashriga bergan intervyusida 14 avgust kuni Finiks shahri atrofidagi San-Siti shaharchasida sodir boʻlgan hujum paytida hushidan ketganini va oʻziga kelganida ustida erkak kishi turganini koʻrganini aytdi.

U politsiyaga darhol xabar bermaganini, balki ikki haftadan keyin Marikopa okrugi sherifi idorasiga ariza topshirganini bildirdi.

Uning respublikachi raqibi Abraxam Xamade oʻz bayonotida rasmiylarni "ushbu jiddiy ayblovlarni sinchiklab tekshirishga, jumladan, voqea sodir boʻlgan vaqt va joydagi barcha mumkin boʻlgan videokamera yozuvlarini topishga" chaqirdi.

"Hech bir amerikalik oʻz mahallasida jinoyat qurboniga aylanmasligi kerak", dedi ikkinchi muddatga oʻz nomzodini qoʻyayotgan Xamade.

Grin-Plasentiya Phoenix New Times nashriga "uyalgani" va "shunchaki unutishni xohlaganini", ammo boshqa qurbonlar uchun ham ovoz chiqarishi kerakligini his qilganini aytdi.

Nomzodning taʼkidlashicha, u saylovoldi tashviqoti paytida saylovchilarga tez-tez Arizona aholisi uchun kurashayotganini aytadi.

U Phoenix New Times nashriga shunday dedi: "Agar jinsiy zoʻravonlik qurboni boʻlgan ayollar uchun ham kurashmasam, bu gapni aytishda davom eta olmaydigandek his qildim".

Hujumdan soʻng, Grin-Plasentiya ikki kun davomida odamlar koʻzidan yiroqda boʻlganini, eridan alohida kvartirada qolganini va saylovoldi tadbirini oʻtkazib yuborganini aytdi.

Phoenix New Times xabariga koʻra, u yana paydo boʻlganida, eri, saylovoldi shtabi xodimlari va atrofidagi boshqa odamlar uning oʻzini boshqacha tuta boshlaganini payqashgan.

Grin-Plasentiya sakkizinchi kongress okrugida sodir boʻlgan hujumdan keyin shifokorga murojaat qilmaganini va jinsiy zoʻravonlik boʻyicha ekspertizadan oʻtmaganini aytdi.

New York Times nashrining yozishicha, u voqealar haqidagi xotiralari toʻliq emasligini va hujum qilganlarning birortasini ham aniq koʻra olmaganini, ammo ularni oq tanli erkaklar deb taʼriflaganini aytgan.

U Phoenix New Times nashriga hujum qilganlardan biri uning siyosiy qarashlari haqida nimadir degan boʻlishi va ayollarga nisbatan haqoratli soʻz ishlatgan boʻlishi mumkinligini, ammo bunga toʻliq ishonchi komil emasligini aytdi.

Nomzod saylovchilar buni asosan respublikachilar ustunlik qiladigan okrugda ustunlikka erishishga qaratilgan siyosiy nayrang sifatida baholashlaridan xavotirda ekanini bildirdi. Shuningdek, u bu ayblovlar uning yashash arzonligi haqidagi asosiy murojaatini soyada qoldirishidan qoʻrqishini aytdi.