AQShning sobiq kongressmeni Venesuela lobbichilik sxemasidagi 50 million dollarlik firibgarligi uchun 10 yilga ozodlikdan mahrum etildi
Riverning sobiq xonadoshi, Davlat kotibi Marko Rubio uning faoliyati haqida hech qanday tasavvurga ega boʻlmagani haqida koʻrsatma berdi.
AQShning sobiq kongressmeni Venesuela foydasiga 50 million dollarlik lobbichilik sxemasi uchun 10 yilga qamaldi
AQShning sobiq kongressmeni pul yuvish va roʻyxatdan oʻtmagan xorijiy agent sifatida faoliyat yuritishda ayblanib, 10 yillik federal qamoq jazosiga hukm qilindi.
Florida shtatidan respublikachi sifatida saylangan 61 yoshli Devid Rivera may oyida yetti haftalik sud jarayonidan soʻng aybdor deb topildi. Sudda Venesuela davlat neft kompaniyasi AQShning Venesuela bilan munosabatlarini yaxshilash maqsadida Kongress aʼzolari orasida lobbichilik qilish uchun Riveraning konsalting firmasini yollagani haqidagi dalillar tinglandi.
Davlat kotibi Marko Rubio (Riveraning sobiq uydoshi) va Texas shtatidan kongressmen Pit Seshns sudda uning faoliyatidan xabardor boʻlmaganini maʼlum qilishdi.
Riveraning himoyachilari lobbichilik Venesuela hukumati uchun emas, balki neft kompaniyasining AQShdagi shoʻʼba korxonasi uchun amalga oshirilganini daʼvo qilishdi.
Rivera bilan birga sudlangan uning sherigi, siyosiy maslahatchi Ester Nufer ham ushbu ish boʻyicha aybdor deb topildi.
2011–2013 yillarda Kongressda faoliyat yuritgan Rivera jazoning bir qismi sifatida Floridadagi mol-mulkidan ham mahrum qilinishi kerak.
Floridadagi federal prokurorlarning bildirishicha, Rivera va Nufer «yashirin siyosiy taʼsir kampaniyasi»da ishtirok etib, Venesuelaning PDVSA davlat neft kompaniyasining AQShda joylashgan shoʻʼba korxonasi (shuningdek, Citgo nomi bilan ham mashhur) manfaatlarini himoya qilish boʻyicha uch oylik ish uchun 50 million dollarlik (37 million funt sterling) shartnoma imzolagan.
Prokurorlarning soʻzlariga koʻra, 2017 va 2018 yillarda Venesuelaning sobiq prezidenti Nikolas Maduro hukumatining iltimosiga binoan, Rivera va Nufer oʻsha paytda senator boʻlgan va Riveraning sobiq uydoshi Marko Rubioga, shuningdek, Oq uyning sobiq katta maslahatchisi Kellian Konueyga taʼsir oʻtkazishga (lobbichilik qilishga) uringan.
Lobbichilik AQSh va Venesuela oʻrtasidagi munosabatlar taranglashgan, prezident Donald Trampning Oq uydagi birinchi muddati davrida, uning maʼmuriyati Janubiy Amerika davlatiga nisbatan sanktsiyalar joriy qilgan paytda yuz bergan.
Rivera va Nuferning himoyachilari ular xorijiy agent sifatida roʻyxatdan oʻtishlari shart emasligini, chunki ularning shartnomasi Venesuela davlat kompaniyasining AQShda joylashgan shoʻʼba korxonasi bilan tuzilganini taʼkidlashdi.
Biroq sudya Melissa Damian juma kungi hukm chiqarish marosimida: «Bu pullar Maduro rejimidan kelgani shubhasizdir», dedi.
Hech qanday qonunbuzarlikda ayblanmagan Rubio sudda koʻrsatma berib, Rivera bilan yaqin doʻst boʻlganini, ammo uning lobbist boʻlib ishlayotganidan xabari yoʻqligini aytdi.