AQShning sakkizta shtati OpenAI’ni sudga berdi
AQShning sakkizta shtati OpenAI’ni sudga berdi
Amerikaning sakkizta shtati OpenAI kompaniyasi ChatGPT xavfsizligi borasida foydalanuvchilarni chalgʻitmoqda, deb daʼvo qilib, unga qarshi daʼvo arizasi kiritdi. Eʼtirozlar orasida xavfli tibbiy maslahatlar, yordamga muhtoj insonlarni oʻziga yoki boshqalarga zarar yetkazishga undash ehtimoli, shuningdek, chat-botga nisbatan nosogʻlom emotsional qaramlikni shakllantirish bor.
Ayova shtati nomidan daʼvo arizasi topshirilgani haqida 14 oktyabr kuni shtat bosh prokurori Brenna Byord maʼlum qildi. Uning soʻzlariga koʻra, kompaniyaning harakatlari Ayovaning isteʼmolchilar huquqlarini himoya qilish toʻgʻrisidagi qonunini buzmoqda. U OpenAI’dan qonunchilikka rioya qilishni va prokuratura fikricha foydalanuvchilar uchun xavf tugʻdirayotgan amaliyotlarni toʻxtatishni talab qildi.
Ayovadan tashqari Kanzas, Nebraska, Gʻarbiy Virdjiniya, Arkanzas, Arizona, Aydaxo va Montana shtatlari ham OpenAI’ga qarshi alohida daʼvolar kiritdi. Byord oʻtkazgan matbuot anjumanida Kanzas, Nebraska va Gʻarbiy Virdjiniya bosh prokurorlari ham ishtirok etdi.
Ayova prokuraturasi bayonotida aytilishicha, ChatGPT voyaga yetmaganlar va boshqa yordamga muhtoj foydalanuvchilar uchun xavfli boʻlishi mumkin. Boshqa eʼtirozlar qatorida tanqidiy fikrlashning susayishi ehtimoli, paranoidal va vasvasa gʻoyalarining kuchayishi, xavfli tibbiy tavsiyalar hamda nosogʻlom xulq-atvorning ragʻbatlantirilishi qayd etilgan. Shu bilan birga, eʼlon qilingan hujjatda idora havola qilayotgan aniq ilmiy tadqiqotlar keltirilmagan.
Prokuratura, shuningdek, avtonom sunʼiy intellekt agentlari nazoratdan chiqib ketgani, boshqa kompaniyalar tizimlarini buzib kirgani va foydalanuvchilarni chalgʻitishga uringani bilan bogʻliq holatlar haqida alohida xabar berdi.
Oldinroq SI-kompaniyalar ehtimoliy miqyosli hodisaga, jumladan, moliyaviy xizmatlar va muhim infratuzilmaga kiberhujumlarga tayyorgarlik koʻrayotgani haqida xabar berilgan edi.