AQShlik qotil Krista Paykni qatl etish rejasi ijro etilishiga bir soat qolganda toʻxtatildi
Payk 1996 yilda Kollin Slemmerni oʻldirganlikda ayblanib, oʻlim jazosiga hukm qilingan edi.
Tennessi shtatidagi mahkuma Krista Paykning qatl etilishi belgilangan vaqtdan bir soat oldin toʻxtatildi.
Agar qatl amalga oshirilsa, Payk Tennessi shtatida oxirgi 200 yildan ortiq vaqt ichida qatl etilgan birinchi ayol boʻladi.
50 yoshli Payk 1996 yilda Kollin Slemmerni oʻldirganlikda ayblanib, oʻlim jazosiga hukm qilinganidan beri oʻlim kamerasida qolmoqda.
Chorshanba kuni Oltinchi okrug apellyatsiya sudi sudyalari Payk ishi boʻyicha dalillarni koʻrib chiqish uchun qoʻshimcha vaqt kerakligini maʼlum qilishdi. Kechiktirish qancha davom etishi hozircha nomaʼlum.
Ushbu qaror AQSh Oliy sudining qatlni vaqtincha toʻxtatish haqidagi iltimosni rad etgani va Tennessi gubernatorining shu hafta boshida Paykning afv etish haqidagi soʻrovini rad etish toʻgʻrisidagi qaroridan keyin qabul qilindi.
Uning advokatlarining taʼkidlashicha, Tennessi shtati yillar davomida sudlarga Payk bolaligida jinsiy zoʻravonlikka uchragani haqida yolgʻon gapirganini aytib kelgan.
Biroq, yaqinda uni qatl etish usuli boʻyicha boʻlib oʻtgan eshituvda shtat rasmiylari uning jinsiy zoʻravonlik va zoʻrlash qurboni boʻlganini inkor etmasliklarini bildirishdi.
Paykning himoyachilar guruhi apellyatsiya sudidan uning iltimosnomasini okrug sudiga qaytarishni soʻradi va agar federal sudlar shtatning avvalgi «u yolgʻon gapiryapti» degan daʼvosiga tayangan boʻlsa, unda federal koʻrib chiqish jarayoni buzilganligini taʼkidladi.
Payk 18 yoshida oʻzining oʻsha paytdagi yigiti bilan birgalikda muammoli oʻsmirlar uchun moʻljallangan kasb-hunarga oʻrgatish lagerida tanishgan 19 yoshli Kollin Slemmerni kaltaklagan, qiynoqqa solgan va oʻldirgan.
Ushbu qotillik 1995 yilda Tennessi shtatining Noksvill shahrida OAVda katta shov-shuvga sabab boʻlgan edi, chunki oʻsmir qizning koʻkragiga shaytoniy guruhlar ramzi boʻlgan pentagramma chizilgan holda topilgan. Payk pentagrammani oʻzi chizganini inkor etgan.
U Slemmer uni haqorat qilgani va yigitini tortib olmoqchi boʻlganini aytgan. Lagerning yana ikki nafar yashovchisi keyinchalik Payk qotillik sodir boʻlishidan oldin va keyin bu bilan maqtangani va ularga Slemmer bosh suyagining bir boʻlagini koʻrsatgani haqida koʻrsatma bergan.
Uning advokatlari «18 yoshli miya hali kattalar miyasi emas» va Payk qotillik sodir etilgan vaqtda buning uchun oʻlim jazosini olish uchun juda yosh boʻlganini daʼvo qilishmoqda.
Tennessi jazoni ijro etish departamenti maʼlumotlariga koʻra, Payk qamoqqa olingan vaqtida oʻlim jazosiga hukm qilingan eng yosh mahkum edi.