AQSh Oliy sudi Krista Paykning qatl etilishini toʻxtatish boʻyicha soʻnggi urinishini rad etdi
Tennessilik mahkuma Krista Payk 1996 yilda qotillikda ayblanganidan beri qatl etilishini kutmoqda.
AQSh Oliy sudi Krista Paykning qatlni toʻxtatish boʻyicha soʻnggi daqiqadagi urinishini rad etdi
Agar qatl amalga oshirilsa, Krista Payk Tennessi shtatida oxirgi 200 yildan ortiq vaqt ichida qatl etilgan ilk ayol boʻladi
AQSh Oliy sudi Tennessi shtatidagi mahkuma Krista Paykning qatl etilishini toʻxtatishdan bosh tortdi, bu qaror unga nisbatan oʻlim inʼyektsiyasi qoʻllanilishi belgilangan kundan atigi bir kun oldin qabul qilindi.
50 yoshli Payk 1996 yilda oʻsmir sinfdoshini oʻldirganlikda ayblanib, oʻlim jazosiga hukm qilinganidan beri oʻlim jazosini kutayotganlar qatorida qolmoqda.
Soʻnggi daqiqada qatlni kechiktirishga umid qilgan holda, uning advokatlari chorshanba kuni ertalab rejalashtirilgan qatl oldidan oliy sudga iltimosnoma taqdim etishgan edi.
Biroq sud ushbu iltimosni qanoatlantirishni rad etganidan soʻng, Payk Tennessi shtatida 200 yildan ortiq vaqt ichida qatl etilgan birinchi ayol boʻlish arafasida turibdi. 1970-yillardan beri AQShda 1663 nafar erkakka nisbatan atigi 18 nafar ayol qatl etilgan.
Dushanba kuni Tennessi gubernatori Bill Li Paykning afv etish haqidagi iltimosini rad etib, rejalashtirilgan qatlni toʻxtatish uchun aralashmasligini maʼlum qildi.
Payk 18 yoshida oʻzining oʻsha paytdagi yigiti bilan birgalikda muammoli oʻsmirlar uchun moʻljallangan kasb-hunarga oʻrgatish lagerida tanishgan 19 yoshli Kollin Slemmerni kaltaklagan, qiynoqqa solgan va oʻldirgan.
U chorshanba kuni Neshvilldagi Riverbend qattiq tartibli qamoqxonasida Sharqiy kunduzgi vaqt bilan soat 11:00 da (Grinvich boʻyicha 15:00) qatl etilishi rejalashtirilgan.