AQShda noqonuniy ravishda yuk mashinasi haydovchisi boʻlib ishlagan ikki Oʻzbekiston fuqarosi qoʻlga olindi

Amerikaning Nyu-Jersi shtatida AQSh Immigratsiya va bojxona xizmati (ICE) xodimlari mamlakatda noqonuniy ravishda boʻlib turgan, ammo shu bilan birga yirik yuk mashinalarini boshqarish uchun tijorat haydovchilik guvohnomasiga ega boʻlgan ikki nafar Oʻzbekiston fuqarosini qoʻlga oldi.

Qoʻlga olishlar tijorat haydovchilik guvohnomalarini berishdagi firibgarlik va qoidabuzarliklarni aniqlash boʻyicha umummilliy keng koʻlamli kampaniya doirasida amalga oshirildi.

Idora xabariga koʻra, 37 yoshli Zohid Zahidov 23 avgust kuni Vudbrijda, 30 yoshli Xayrullo Payzullayev esa Gamiltonda qoʻlga olingan. Hozirda ikkalasi ham ICE hibsxonasida saqlanmoqda va deportatsiya qilinishini kutmoqda.

Amerika idorasi maʼlumotlariga koʻra, Zahidov Nyu-Yorkda berilgan tijorat transportini boshqarish boʻyicha oʻquvchilik guvohnomasiga ega boʻlgan. 15 may kuni u mast holatda mashina boshqarganlikda aybdor deb topilgan. Bundan tashqari, unga tan jarohati yetkazish maqsadida hujum qilish va taʼqib qilish ayblovlari qoʻyilgan.

Ikkinchi qoʻlga olingan shaxs, Payzullayev, Pensilvaniyadan tashqarida berilgan tijorat haydovchilik guvohnomasiga ega boʻlgan. 21 iyul kuni AQSh Adliya vazirligining immigratsiya sudyasi uni hibsga olish haqida qaror chiqargan.

ICE vakillarining maʼlum qilishicha, ushbu hibsga olishlar AQSh Ichki xavfsizlik vazirligining firibgarlik va tijorat haydovchilik guvohnomalarini noqonuniy olishga qarshi kurashish boʻyicha umummilliy kampaniyasining bir qismidir.

Avvalroq Toshkentga Shvetsiya va Polsha migratsiya qonunchiligini buzgan 27 nafar deportatsiya qilingan Oʻzbekiston fuqarosi boʻlgan charter reysi yetib kelgan edi.