AQSh sudi Davlat departamentiga grin-karta lotereyasi uchun roʻyxatdan oʻtishni 1 noyabrgacha ochish majburiyatini yukladi
AQSh sudi Davlat departamentiga 1 noyabrgacha grin-karta lotereyasiga roʻyxatdan oʻtishni ochish majburiyatini yukladi
Kaliforniya Janubiy okrugi federal sudi AQSh Davlat departamentiga roʻyxatdan oʻtish hanuzgacha boshlanmagan DV-2027 grin-karta lotereyasini oʻtkazish majburiyatini yukladi. Muddatlar qayta koʻrib chiqilgach, idora arizalarni qabul qilishni 1 noyabrdan kechiktirmasdan ochishi, saralash natijalarini esa 3 dekabrgacha eʼlon qilishi kerak.
14 oktyabr kuni sudya Djinsuk Ota tomonlarning ilgari belgilangan muddatlarni koʻchirish haqidagi birgalikdagi iltimosnomasini qanoatlantirdi. AQSh davlat kotibi Marko Rubioga qarshi daʼvoni lotereya oʻtkazilishiga erishayotgan Red Eagle Law yuridik firmasi kiritgan edi. Muddatlar toʻgʻrilangani haqida firmaning oʻzi xabar berdi.
Dastlab sud Davlat departamentiga roʻyxatdan oʻtish sanalarini 15 oktyabrgacha eʼlon qilish, arizalar qabulini 18 oktyabrdan kechiktirmasdan boshlash va uni 30 kun davomida olib borish majburiyatini yuklagan edi. Saralash yakunlari 19 noyabrgacha eʼlon qilinishi kerak edi.
Donald Tramp administratsiyasi ushbu qaror ustidan shikoyat qilishi mumkin. 15 oktyabr holatiga koʻra, Red Eagle Law’ning Marko Rubioga qarshi daʼvosi boʻyicha apellyatsiya berilgani haqida tasdiqlar yoʻq edi. Dasturning rasmiy veb-saytida DV-2027 uchun roʻyxatdan oʻtish ham yopiqligicha qolayotgan edi.
Navbatdagi oʻyinga roʻyxatdan oʻtish 2025 yilning kuzida boʻlib oʻtishi kerak edi. Biroq 5 noyabr kuni AQSh maxsus vakili Kristi Noem ishtirok etish tartibi oʻzgarganini maʼlum qildi va yangi sanalarni keyinroq eʼlon qilishga vaʼda berdi. Aniq muddatlar baribir aytilmadi.
2026 yilning avgustida Red Eagle Law sudga murojaat qilib, idoradan lotereyani oʻtkazishni talab qildi. Sentyabr oyida sudya shoshilinch choralar joriy etishni rad etdi, ammo ishni koʻrib chiqishni davom ettirdi.
Diversity Visa dasturi har yili AQShga nisbatan kam immigrant keladigan mamlakatlar fuqarolari uchun 55 mingtagacha immigratsiya vizalarini taqsimlashni nazarda tutadi.