AQSH Rossiyaga bogʻliq RIS Network tarmogʻiga qarshi ayblovlar eʼlon qildi
AQSH Adliya vazirligi Rossiya maxsus xizmatlariga aloqador deb koʻrsatilayotgan RIS Network tarmogʻi aʼzolarini terrorizmni moliyalashtirish hamda AQSH va boshqa davlatlarda buyurtma asosida qotilliklar sodir etish uchun til biriktirishda aybladi. Tergov maʼlumotlariga koʻra, tarmoq Ukrainaga yordam berayotgan Yevropa mamlakatlaridagi fuqarolik va harbiy infratuzilma obyektlariga hujumlar uyushtirishga ham uringan.
AQSH Rossiyaga aloqador RIS Network tarmogʻiga qarshi ayblovlarni eʼlon qildi
AQSHning Nyu-York Janubiy okrugi prokuraturasi bir nechta shaxsga terrorizmni moliyalashtirish hamda dunyoning turli mamlakatlarida, jumladan AQSH hududida buyurtma qotilliklarni amalga oshirish maqsadida til biriktirish bo‘yicha ayblov qo‘ydi. Bu haqda 15-sentabr kuni AQSH Adliya vazirligi maʼlum qildi.
Amerika tomonining taʼkidlashicha, ayblanuvchilar Rossiya maxsus xizmatlari manfaatlari yo‘lida harakat qilgan va RIS Network deb ataluvchi xalqaro tarmoq bilan bog‘liq bo‘lgan.
Ayblov xulosasida qayd etilishicha, tarmoq aʼzolari AQSH va boshqa davlatlardagi shaxslarga muayyan obyektlar hamda odamlar haqida dastlabki maʼlumot to‘plash, shuningdek, nishonga olingan shaxslarni o‘ldirish uchun pul to‘lagan. Bundan tashqari, ularning sheriklariga Ukrainaga yordam ko‘rsatayotgan yoki Kiyev tarafdori deb hisoblangan Yevropa mamlakatlarida fuqarolik va harbiy infratuzilma obyektlariga hujumlar uyushtirish vazifasi berilgani iddao qilinmoqda.
Mazkur ish bo‘yicha tergovda AQSH Federal tergov byurosi — FTB ham qatnashgan.
AQSH bosh prokurorining milliy xavfsizlik masalalari bo‘yicha yordamchisi Jon Ayzenbergning aytishicha, gumonlanuvchilar AQSH fuqarolari va xorijliklarni Rossiya rahbariyati topshirig‘i asosida qotilliklar sodir etish uchun yollashga uringan.
ABC News telekanali AQSH bosh prokurori Todd Blanshga tayanib xabar berishicha, eʼlon qilingan ayblovlar orasida Vashington shahrida bo‘lishi mumkin deb hisoblangan rossiyalik dissidentni o‘ldirishga urinish bilan bog‘liq epizod ham bor.
AQSH Adliya vazirligi RIS Networkʼni Rossiya davlat apparatining xorijda hujumlar, jumladan qotilliklarni tashkil etish bilan shug‘ullanuvchi tarmog‘i sifatida taʼriflamoqda. Vazirlik maʼlumotiga ko‘ra, tarmoq avval Rossiyadan chiqqan dissidentlar va maxsus xizmatlarni tark etgan shaxslarga eʼtibor qaratgan, keyinchalik esa Ukraina ittifoqchilari hisoblangan davlatlarni ham nishonga ola boshlagan.
AQSH rasmiylariga ko‘ra, ayblanuvchilardan uch nafari RIS Network tarmog‘ida yuqori lavozimlarni egallagan.
Ulardan biri — «Polkovnik Yuriy» laqabi bilan tanilgan Yuriy Xrameyev. AQSH prokuraturasi uni Rossiya maxsus xizmatlarining sobiq polkovnigi deb ko‘rsatmoqda. Ayblovga ko‘ra, Xrameyev rossiyalik dissidentlarni o‘ldirish uchun ijrochilarni jalb qilish jarayonida qatnashgan.