AQSh raketa Eron toʻyiga kelib tushganini tekshirmoqda, deydi Vens
Eron Qizil Yarim Oy Jamiyati (IRCS) seshanba kuni raketa parchasi marosim oʻtkazilayotgan joyga kelib tushishi oqibatida toʻrt kishi halok boʻlganini maʼlum qildi.
AQSh raketa Eronning janubidagi toʻyda portlagani haqidagi xabarlarni oʻrganmoqda, deydi Vens
AQSh harbiylari Eron janubidagi toʻyda kamida toʻrt kishi, jumladan ikki bola halok boʻlgani haqidagi Eron tomonining daʼvolarini oʻrganmoqda, dedi vitse-prezident Jey Di Vens.
Insonparvarlik tashkiloti boʻlmish Eron Qizil Yarim Oy Jamiyati seshanba kuni Sirikdagi uylardan birida boʻlib oʻtayotgan marosimga raketa parchasi kelib tekkanini maʼlum qildi. Bu Eron Tashqi ishlar vazirligi matbuot kotibi Ismoil Baqoiy tomonidan "harbiy jinoyat" deb atalishiga sabab boʻldi.
AQSh raketalari oʻsha kuni Eronning Amerika kuchlariga qilgan "hujum urinishlari"ga javoban uchirilgan edi, biroq AQSh Markaziy qoʻmondonligi matbuot kotibi AQSh "hech qachon tinch aholini nishonga olmasligini" taʼkidladi.
Payshanba kuni gapirgan Vens ushbu hujum haqidagi xabarlarga "juda shubha bilan qarashini" aytdi, ammo AQSh buni tekshirishini tasdiqladi.
"Shuni ayta olamanki, Eron davlat OAVlari shu paytgacha mojaroda nimalar sodir boʻlgani haqida xolis xabar bermagan. Shu bois men bunga juda shubha bilan qarayman", dedi Vens Oq uydagi brifingda.
"Biz buni tekshirayotganimizni bilaman."
Eron ushbu hujumga javoban AQShning Quvayt va Birlashgan Arab Amirliklaridagi bazalariga yangi hujumlar uyushtirdi.
Eron Qizil Yarim Oy Jamiyatining maʼlum qilishicha, raketa parchasi oilaviy toʻy marosimiga tekkani oqibatida 67 kishi jarohatlangan, kamida toʻrt kishi halok boʻlgan. Eron davlat OAVlari beshinchi qurbon — 22 yoshli ayol koʻp oʻtmay shifoxonada vafot etganini xabar qildi.
Halok boʻlgan toʻrt kishining shaxsi mahalliy darajada aniqlandi: 50 yoshli Zarxatun Taheri, 43 yoshli Kulsum Mallahi Najdnia, 16 yoshli Muhammad Mallahi va toʻrt yoshli Amirali Karimi.
BBC Verify seshanba kuni Kuhestak sohili yaqinida olingan video va ikkita suratni tasdiqladi, ularda telekommunikatsiya minorasi vayron boʻlgani aks etgan. Seshanba va chorshanba kunlari olingan boshqa videolarda esa minoradan taxminan 130 metr (427 fut) shimolda joylashgan qattiq shikastlangan uylar koʻringan.
BBC Persian Forensics telekommunikatsiya minorasi toʻy boʻlayotgan uydan taxminan 112 metr (367 fut) uzoqlikda joylashganini aniqladi.
AQSh va Isroil 28 fevral kuni Eronga qoʻshma hujum boshlaganidan beri ushbu mamlakat bilan toʻqnashuvlar yarim yildan ortiq vaqtdan beri davom etmoqda.