Apple Pay va Google Pay Oʻzbekistonda ulana boshlandi

Oʻzbekistonda Apple Pay va Google Pay ulana boshlandi

Oʻzbekistonda 27 oktyabr kuni Apple Pay ishga tushirilishining ilk belgilari paydo boʻldi: iPhone foydalanuvchilari uchun Apple Wallet ilovasiga kartalarini qoʻshish mumkin boʻlgan mahalliy banklar roʻyxati ochildi. Roʻyxatga sakkizta bank va fintex-servis kirdi. Google 19 oktyabrdayoq Google Pay ishga tushirilganini rasman tasdiqlagan edi, biroq kartalar servisga 27 oktyabrdan ulana boshladi.

ATTO transport kartasini Apple Wallet ilovasiga qoʻshishga urinish paytida Oʻzbekistonda chiqarilgan bank kartalarini ulash imkoniyati haqida bildirishnoma paydo boʻldi.

Apple xabarida quyidagi banklar va qoʻllab-quvvatlanadigan toʻlov tizimlari keltirilgan:

Apple ayrim banklar kartalarning hamma turlarini ham qoʻllab-quvvatlamasligi mumkinligini aniqlashtiradi. Yangi banklar qoʻshilishi bilan roʻyxat boyitib boriladi. Muayyan kartani ulash imkoniyatini uning emitentidan aniqlashtirish tavsiya etiladi.

Material tayyorlanayotgan vaqtda Oʻzbekiston Apple saytida eʼlon qilingan Apple Pay xizmatini qoʻllab-quvvatlaydigan mamlakatlar roʻyxatida hali yoʻq edi. Ushbu sahifaning oxirgi yangilanishi 19 oktyabrga toʻgʻri keladi.

Google rasmiy saytida Oʻzbekiston Google Wallet ilovasi, kontaktsiz toʻlov va elektron hamyonning veb-versiyasi qoʻllab-quvvatlanadigan mamlakatlar qatorida koʻrsatilgan.

Xususan, foydalanuvchilarga Android smartfonlari, Wear OS boshqaruvidagi aqlli soatlar va mos keluvchi Fitbit qurilmalari yordamida kontaktsiz toʻlovlarni amalga oshirish imkoniyati mavjud.

Google Wallet shuningdek chiptalar, transport yoʻl chiptalari, sodiqlik kartalari, ruxsatnomalar va boshqa raqamli hujjatlarni saqlash imkonini beradi. Alohida funktsiyalarning mavjudligi mamlakatga, qurilmaga va servis hamkorlariga bogʻliq.

Smartfon yordamida xaridlar uchun toʻlovni amalga oshirish uchun Google Wallet’ga qoʻllab-quvvatlanadigan bank kartasini qoʻshish, uning rekvizitlarini (karta raqami, orqa tomonidagi CVV-kod, bank manzili) toʻldirish zarur.

«Gazeta» muxbirlari Apple va Android telefonlariga Visa bank kartalarini ulashga muvaffaq boʻlishdi.

19 oktyabr kuni Google Cloud vakili Marchin Krasuski Samarqandda Markaziy Osiyo mamlakatlari va AQShning C5+1 formatidagi uchrashuvlari doirasida oʻtkazilgan raqamli texnologiyalar boʻyicha tadbirda Oʻzbekistonda Google Pay ishga tushirilganini eʼlon qildi.

22 oktyabr kuni Oʻzbekiston Turizm qoʻmitasi Google Pay mamlakatda allaqachon ishlayotgani, Apple Pay esa yaqin kunlarda ishga tushishi kutilayotganini maʼlum qildi (keyinchalik bu xabar oʻchirib tashlandi). Idora maʼlumotlariga koʻra, servisning texnik integratsiyasi bilan Markaziy bank, tijorat banklari va HUMO hamda Uzcard toʻlov tizimlari shugʻullanmoqda.

Avvalroq Spot nashri bir nechta manbalarga tayanib, Apple Pay ishga tushirilishining taxminiy sanasi sifatida 27 oktyabr koʻrsatilgani haqida xabar bergan edi. Servis bir vaqtning oʻzida bir nechta bankda ishlay boshlashi taxmin qilingandi.

Xalqaro toʻlov servislarini ishga tushirishga tayyorgarlik shaxsiy maʼlumotlar toʻgʻrisidagi qonunchilik oʻzgarganidan keyin faollashdi.

26 mart kuni prezident Shavkat Mirziyoyev muayyan shartlarga rioya qilingan holda Oʻzbekiston fuqarolarining bir qator shaxsiy maʼlumotlarini xorijda saqlash va ularga ishlov berishga ruxsat beruvchi qonunni imzoladi. Ilgari amalda boʻlgan maʼlumotlarni lokalizatsiya qilish talablari Apple Pay va Google Pay’ning mamlakat bozoriga kirib kelishi uchun asosiy toʻsiqlardan biri edi.

Shu bilan birga, biometrik va genetik maʼlumotlar, shuningdek, mahalliy telekommunikatsiya operatorlari xizmatlaridan foydalanuvchilarning maʼlumotlari uchun Oʻzbekiston hududida majburiy saqlash talabi saqlanib qoldi.

Iyul oyida Markaziy bank Apple Pay va Google Pay’ni ishga tushirish boʻyicha texnik tayyorgarlik koʻrilayotganini maʼlum qilgan edi. Banklar, shuningdek, xizmatlarga nafaqat xalqaro Visa va Mastercard, balki milliy HUMO va Uzcard kartalarini ham ulash imkoniyatini taʼminlash uchun kartalarni tokenizatsiya qilish bilan shugʻullanayotgan edi.