Andijon shahridagi Boburshoh koʻchasining ikki qismini bogʻlovchi yangi yoʻloʻtkazgich ishga tushirildi
Andijon shahridagi Boburshoh koʻchasining ikki qismini bogʻlovchi yangi yoʻloʻtkazgich foydalanishga topshirildi
Shavkat Mirziyoyev Andijon shahrida Boburshoh koʻchasining ikki qismini tutashtiruvchi yangi yoʻloʻtkazgich bilan tanishdi.
Mazkur inshoot shaharning ikki qismini bevosita bogʻlab, transport qatnovini yengillashtirish va ortiqcha aylanma yoʻlni yoʻqotishga xizmat qiladi. Umumiy qiymati 271 milliard soʻm boʻlgan loyiha davlat rahbarining Andijon viloyatiga avvalgi tashrifi chogʻida bergan topshirigʻi asosida amalga oshirildi.
Yoʻloʻtkazgichning jami uzunligi 796 metr, eni 25,9 metrni tashkil etadi. Uning 596 metri estakada, 200 metri esa tirgak devorli yoʻl qismidan iborat.
Yangi inshoot, avvalo, aholi uchun katta qulaylik yaratdi. Andijon shahri va Oltinkoʻl tumanida yashovchi 140 ming nafar aholi endilikda 5,3 kilometr ortiqcha yoʻl bosmaydi.
Shuningdek, maxsus xizmatlar uchun qatnov masofasi 15 kilometrdan 9,3 kilometrga tushdi. Ortiqcha masofa hamda temir yoʻl kesishmasidagi kutishlar bartaraf etilgani hisobiga manzilga yetib borish vaqti 17 daqiqagacha qisqaradi.
Ayniqsa, bu shoshilinch tibbiy yordam koʻrsatishda muhim ahamiyat kasb etadi. Endilikda bemorlarni shoshilinch tibbiy yordam markaziga avvalgidan 14 daqiqa ertaroq yetkazish imkoniyati yaratildi.