Andijon bojxonachilari yuk mashinasida deklaratsiyalanmagan 20 ming dollarni topdilar
Andijon bojxonachilari yuk mashinasida deklaratsiyada koʻrsatilmagan 20 ming dollarni aniqlashdi
Andijon viloyatidagi «Xonobod» chegara bojxona postida qoʻshni davlatga qarab harakatlanayotgan avtomobilni koʻzdan kechirish chogʻida bojxona nazoratiga taqdim etilmagan 20 ming dollar naqd pul aniqlandi. Haydovchi, shuningdek, ogʻzaki soʻrov paytida ushbu mablagʻ mavjudligini koʻrsatmagan.
Bu haqda 24 oktyabr kuni Oʻzbekiston Davlat bojxona xizmati xabar berdi. Deklaratsiyalanmagan valyuta transport vositasini bojxona koʻrikdan oʻtkazish chogʻida topilgan.
Hozirda ushbu fakt yuzasidan surishtiruv harakatlari olib borilmoqda. Hodisaning boshqa tafsilotlari ochiqlanmayapti.
Avvalroq Andijon viloyatidagi boshqa bir chegara bojxona postida Qirgʻizistonga yoʻl olgan yuk mashinasi haydovchisidan u deklaratsiya qilmagan 34 ming dollar topilgan edi. Naqd pullar erkakning qoʻl sumkasi va kiyimi choʻntaklaridan aniqlangan.