Amazon olti yillik shartnoma doirasida «Emmi» mukofotini translyatsiya qilish boʻyika global huquqlarni qoʻlga kiritdi
Gala-kontsert AQShning anʼanaviy telekoʻrsatuv tarmoqlarini tark etib, butun dunyo boʻylab jonli efirda namoyish etiladigan striming platformalariga oʻtmoqda.
Amazon olti yillik shartnoma asosida Emmi mukofotini butun dunyo boʻylab translyatsiya qilish huquqini qoʻlga kiritdi
Ushbu kelishuv marosimni ABC, CBS, Fox va NBC kabi yirik tarmoqlar oʻrtasida navbatma-navbat almashib koʻrsatishni nazarda tutuvchi «Gʻildirak kelishuvi» (Wheel Deal) tizimiga chek qoʻyadi.
Amazon Prime Video olti yillik shartnomaga koʻra Emmi mukofotini topshirish marosimini translyatsiya qilish boʻyicha eksklyuziv global huquqlarni qoʻlga kiritdi va bu bilan marosimning AQShning anʼanaviy efir televideniyesidagi ishtiroki yakunlandi.
2027 yildan boshlab ushbu bitim tantanali marosimni ABC, CBS, Fox va NBC kabi yirik tarmoqlar oʻrtasida navbatma-navbat aylantirishni almashtiradi. Buning oʻrniga, shou har yili sentyabr oyida butun dunyo boʻylab bepul va jonli efirda namoyish etiladi, buning uchun Prime Video obunasi talab etilmaydi.
Rasmiy shartlar oshkor qilinmadi.
Bu oʻzgarish tomosha qilish odatlari oʻzgarishi bilan jonli tadbirlarning raqamli platformalarga koʻchayotganining yana bir belgisidir. Masalan, Oskar mukofoti topshirish marosimi 2029 yildan boshlab YouTube platformasida butun dunyo boʻylab jonli efirda namoyish etilishi belgilangan.
Forrester tadqiqot direktori Mayk Prulksning aytishicha, amaldagi tizim zamonaviy televideniyedan orqada qolib ketgan edi.
«Sohani oldinga boshlayotgan shoular asosan striming platformalarida yaratiladi, biroq mukofotlarning oʻzi efir televideniyesiga bogʻlanib qolgan edi», dedi Prulks.
«Shu bois Prime Video kabi yetakchi striming xizmati Emmining keyingi bosqichi uchun juda mos keladi».
Televideniye akademiyasi raisi Kris Abrego ushbu kelishuv marosimga «misli koʻrilmagan global qamrov» taqdim etishini va 200 dan ortiq mamlakatlardagi tomoshabinlarga jonli efirni kuzatish imkonini berishini aytdi.
«Televideniye hech qachon hozirgidek global boʻlmagan va Emmi butun dunyo baham koʻrishi mumkin boʻlgan bayramga aylanishi kerak», dedi Abrego Amazon tomonidan eʼlon qilingan bayonotda.
Prime Video va Amazon MGM Studios rahbari Mayk Xopkins ushbu xizmat marosim uchun «global uy» boʻlishdan sharaflanishini taʼkidlab, tadbirni bepul translyatsiya qilish «butun dunyodagi mijozlarimizga eng yaxshi koʻngilochar dasturlarni» taqdim etishini qoʻshimcha qildi.
Ushbu kelishuv Amazon uchun muhim burilish nuqtasi boʻlib, Prime Video sport yoʻnalishida, jumladan, NFL'ning Thursday Night Football, NBA va UYEFA Chempionlar Ligasi oʻyinlari atrofida jonli efir takliflarini rivojlantirganidan soʻng, unga oʻzining birinchi yirik koʻngilochar translyatsiyasini taqdim etadi.
Amazon'ning soʻnggi moliyaviy koʻrsatkichlari jonli efir tomoshabinlari sonining sezilarli darajada oʻsganini koʻrsatdi, jumladan, uning birinchi NBA mavsumi uchun rekord darajadagi reytinglar qayd etildi va Sharqiy konferentsiya yarim finalining 7-oʻyinida tomoshabinlar soni eng yuqori nuqtada 6,5 millionga yetdi.
Emmi kelishuvi Amazon'ni toʻgʻridan-toʻgʻri Google bilan bir qatorga qoʻyadi, uning videoplatformasi YouTube yaqinlashib kelayotgan Oskar translyatsiyasi huquqlariga ega.
YouTube asosan reklamaga asoslangan modeldan foydalanadi, Amazon esa ulkan global auditoriyani oʻzining kengroq ekotizimiga jalb qilish uchun bepul jonli ulanishdan foydalanmoqda.
Jonli sport translyatsiyalarida boʻlgani kabi, bepul efir Amazon'ga sezilarli global reklama mavqeini egallashga yordam beradi.
Фақатгина Prime Video'ga oʻtish Emmi uchun katta oʻzgarishdir, bu 1955 yildan beri mavjud boʻlgan yirik anʼanaviy efir tarmoqlari oʻrtasidagi navbatma-navbat almashishni yakunlaydi va tantanali marosim anʼanaviy efir televideniyesini butunlay tark etadigan birinchi holat boʻladi.
Ilk bor 1949 yilda topshirilgan Emmi mukofoti aktyorlik mahorati, stsenariy va prodyuserlik sohasidagi yutuqlarni eʼtirof etadi hamda global televideniye industriyasi uchun asosiy koʻrgazma boʻlib xizmat qiladi.