Amazon Mayamidagi fojiali halokatdan soʻng yuk tashuvchi aviakompaniya bilan hamkorlikni vaqtincha toʻxtatdi
21 Air aviakompaniyasiga tegishli reaktiv samolyot Mayami xalqaro aeroportida uchish-qoʻnish yoʻlagidan chiqib ketdi va bir nechta transport vositasiga borib urildi.
Amazon Mayamidagi fojiali halokatdan keyin yuk tashuvchi aviakompaniya bilan hamkorlikni toʻxtatdi
Elektron tijorat giganti Amazon shu oyda Mayamida halokatga uchragan yuk samolyotini boshqargan kompaniya bilan hamkorlikni vaqtincha toʻxtatishini maʼlum qildi.
«Oʻtgan dam olish kunlaridagi fojiali hodisadan soʻng, biz tergovni qoʻllab-quvvatlash va u bilan bogʻliq baʼzi holatlarni oʻrganishga vaqt ajratdik va 21 Air bilan operatsiyalarimizni vaqtincha toʻxtatishga qaror qildik», — dedi yakshanba kuni Amazon vakili.
6 sentyabr kuni 21 Air tomonidan boshqarilgan Boeing samolyoti Mayami xalqaro aeroportida uchish-qoʻnish yoʻlagidan chiqib ketib, bir nechta transport vositasi bilan toʻqnashgan va oqibatda besh kishi halok boʻlgan edi.
Kompaniya bundan avvalroq «halokatdan qattiq qaygʻuda ekanini» va hodisani oʻrganishda rasmiy idoralar bilan hamkorlik qilayotganini bildirgan edi.
Halokat yuzasidan tergovni AQSh Milliy transport xavfsizligi kengashi (NTSB) olib bormoqda.
Amazon vakili Kelli Nantel shunday dedi: «Oʻz faoliyatimizda boʻladimi yoki hamkorlar bilan ishlashdami, xavfsizlik hamisha bizning bosh ustuvor vazifamiz boʻlib kelgan».
«Biz tergovni va jabrlanganlarning barchasini qoʻllab-quvvatlash ustida ishlashni davom ettiramiz», — deya qoʻshimcha qildi u.
Boeing 767-300 yuk samolyoti Puerto-Rikoning San-Xuan shahridagi Luis Munos Marin xalqaro aeroportidan uchib ketib, Mayamida halokatga uchragan.
Havo kemasi uchish-qoʻnish yoʻlagidan chiqib ketib, yaqin atrofdagi transport vositalariga urilgan va soʻngra sirpanib borib toʻxtagan.
NTSB raisi Jennifer Xomendi halokat joyini «mutlaq vayronagarchilik» manzarasi deb taʼrifladi.
Oʻtgan hafta Mayami rasmiylari halok boʻlgan besh kishining shaxsini aniqladi, ular: 55 yoshli Rolando Aleman Leon, 53 yoshli Yoel Rodriges Naranxo, 75 yoshli Xulio S. Pineda, 53 yoshli Karlos Akosta Faxardo va 47 yoshli Xaviyerkis Reyes Kevedo.
Yana besh kishi jarohatlangan.
Tergovchilar halokatga olib kelgan sharoitlarni tahlil qilish uchun parvoz yozuvchi qurilmalarni («qora quti»larni) qoʻlga kiritishdi.
21 Air — Amazon va DHL kabi yirik firmalar uchun parvozlarni amalga oshiradigan toʻliq yuk tashuvchi aviakompaniyadir.