Aleksandr Vuchich Serbiya prezidenti lavozimidan sentyabr oxirida ketishini aytdi
Aleksandr Vuchich Serbiya prezidenti lavozimini sentyabr oxirida tark etishini bildirdi
Serbiya prezidenti Aleksandr Vuchich 25 yoki 26-sentyabr kuni lavozimidan iste’fo berishini ma’lum qildi.
Uning so‘zlariga ko‘ra, Nyu Yorkdan qaytgach iste’fo beradi va undan keyin parlament saylovi kampaniyasida oddiy fuqaro sifatida qatnashadi.
“Bosh vazir lavozimi uchun Respublika prezidenti sifatida kampaniya olib borishni istamayman. Bu qonun talabi emas, mening xohishim”, dedi Vuchich.
U Serbiyada prezidentlikdan iste’fo berib, keyin oddiy fuqaro sifatida saylov kampaniyasini olib borgan rahbar bo‘lmaganini ham ta’kidladi.
Vuchich kampaniyaning so‘nggi bir oyida o‘z avtomobilida mamlakat bo‘ylab yurishini aytdi. U kichik yuk mashinasini ham olib, shahar va qishloqlarda odamlar oldida chiqish qilishni rejalashtirmoqda.
“Oldindan maxsus rejasiz yuraman. Qaysi qishloq yoki shaharga borsam, odamlarga bir necha og‘iz gap aytaman”, deydi Serbiya prezidenti.
Serbiyada muddatidan oldingi parlament saylovi 25-oktyabr kuni bo‘lib o‘tadi. Vuchich 9-sentyabrda parlamentni tarqatib yuborgandi. Navbatdagi parlament saylovi aslida 2027-yil dekabriga rejalashtirilgan edi.
Hukmron Serbiya progressiv partiyasi Vuchichni saylovda g‘alaba qozongan taqdirda bosh vazir lavozimiga nomzod sifatida ilgari surgan. U ikkinchi prezidentlik muddatini o‘tayotgani sabab yana prezidentlikka nomzod bo‘la olmaydi.
25-oktyabrdagi saylov Serbiyada qariyb ikki yildan beri davom etayotgan hukumatga qarshi namoyishlar fonida o‘tadi. Noroziliklar 2024-yil noyabrda Novi-Sad temiryo‘l vokzalida soyabon qulab, 16 kishi halok bo‘lganidan keyin boshlangan. Namoyishchilar fojiani korrupsiya va davlat nazoratidagi kamchiliklar bilan bog‘lamoqda, rasmiylar esa ayblovlarni rad etadi.
Vuchich iyun oyida ham yana bir necha hafta prezident bo‘lib, keyin iste’foga chiqishini aytgandi.