Aldi rahbari baʼzi sodiqlik chegirmalari xaridorlarni «aldashini» aytdi
Aldi millionlab xaridorlar tomonidan foydalaniladigan va juda ommabop boʻlgan sodiqlik dasturiga ega boʻlmagan yagona yirik supermarketlar tarmogʻidir.
Aldi rahbari baʼzi sodiqlik chegirmalari xaridorlarni «aldashini» aytdi
Aldi supermarketlar tarmogʻining Buyuk Britaniyadagi rahbari raqobatchi tarmoqlarni baʼzi hollarda «haqiqatga toʻgʻri kelmaydigan darajada yuqori narxlardan» boshlanib, keyin pasaytiriladigan sodiqlik chegirmalari bilan xaridorlarni chalgʻitishda aybladi.
Bosh ijrochi direktor Jayls Xyorli chegirmalar «haqiqiy boʻlganda va real pasayishlarni koʻrsatganda» foydali ekanini aytdi, biroq u «xaridorlarni aldaydigan» noreal chegirmalarni tanqid qildi.
Aldi sodiqlik dasturlari juda ommabop boʻlishiga va millionlab xaridorlar tomonidan qoʻllanilishiga qaramay, bunday tizimni joriy etmagan yagona yirik supermarketlar tarmogʻidir.
Buyuk Britaniyaning rasmiy raqobat nazorati organi 2024 yilda supermarketlarning sodiqlik narxlari tizimini oʻrganib chiqdi va xaridorlar «deyarli har doim haqiqiy tejamkorlikka erishishini» aniqladi.
Asda sobiq xaridori va chakana savdo boʻyicha maslahatchi Ged Fatter BBC’ga bergan intervyusida Xyorlining soʻzlari «Aldi Buyuk Britaniyada bosim ostida qolayotgani haqidagi faktdan chalgʻitish» ekanini aytdi.
Uning soʻzlariga koʻra, Aldi «taxminan ikki yil oldingacha shiddat bilan oʻsib borayotgan edi», ammo «hozirda asosiy supermarketlar guruhidan orqada qolmoqda».
«Narxlardagi farq ilgarigidek yaqqol sezilmayapti», deya qoʻshimcha qildi u.
Ilgari ham chegirma tizimlari haqida shunga oʻxshash fikrlarni bildirgan Xyorli, Aldi 2024 yilga nisbatan 2025 yilda sotuvlar hajmi 5 foizga oshib, 19 milliard funt sterlingga yetganini eʼlon qilgan paytda gapirdi.
Biroq, xuddi shu davrda operatsion foyda biroz kamaydi, buni chakana savdogar xodimlar ish haqining oshishi hamda infratuzilma va narxlarga kiritilgan investitsiyalar bilan izohladi.
Xyorlining aytishicha, sohadagi kuchli raqobatga qaramay, kompaniya hali ham yangi xaridorlarni jalb qilmoqda.
«Biz haftalik xaridlaringiz narxi oʻtgan yozga qaraganda bu yozda arzonroq boʻlgan yagona chakana savdogarmiz», dedi Xyorli.
Uning soʻzlariga koʻra, biznes «keyingi haftada yoʻqolib ketadigan qisqa muddatli takliflarga emas, balki kundalik past narxlarga» eʼtibor qaratgan.
«Agar aktsiyalar mazmunli, haqiqiy boʻlsa va real pasayishlarni koʻrsatsa, ular kundalik past narxlarni toʻldirishi mumkin.
Biroq, aktsiyalar haqiqatga toʻgʻri kelmaydigan darajada yuqori narxlardan boshlanib, u qadar raqobatbardosh boʻlmagan va xaridorlarni aldaydigan narxlarga tushganda, biz buni qoʻllab-quvvatlamaydigan, shaffof boʻlmagan va xaridorlarga rejalashtirish hamda byudjet tuzishda yordam bermaydigan sodiqlik deb hisoblaymiz».
Aldi joriy yilda narxlarni pasaytirish uchun 340 million funt sterling sarflaganini maʼlum qildi. Germaniyaga tegishli tarmoq, shuningdek, 900 million funt sterlinglik investitsiya dasturi doirasida kelgusi yilda 40 ta yangi doʻkon ochishni va britaniyalik yetkazib beruvchilar bilan uzoq muddatli shartnomalarni kengaytirishni rejalashtirayotganini bildirdi.
Xyorlining taʼkidlashicha, soʻnggi qurgʻoqchiliklar va global voqealar oziq-ovqat mahsulotlarini yetkazib berish zanjiridagi zaif tomonlarni koʻrsatdi. U ichki ishlab chiqarishni koʻpaytirish milliy strategik ustuvor vazifa boʻlishi kerakligini va bu Buyuk Britaniyaning oziq-ovqat narxlarini oshirishi mumkin boʻlgan inqirozlarga taʼsirchanligini kamaytirishga yordam berishini taʼkidladi.