Afg‘onistonda to‘y va bayramlarda mushakbozlik qilish taqiqlandi
Afg‘onistonda to‘ylar va bayram tadbirlarida mushak, petarda va boshqa pirotexnika vositalaridan foydalanish taqiqlandi. Cheklov ularni ishlab chiqarish, olib kirish va sotishni ham qamrab oladi. Fazilatlarni targ‘ib qilish va yomonliklarning oldini olish vazirligi buni aholini stressdan himoyalash bilan izohladi.
Afg‘onistonda to‘y va bayramlarda mushakbozlik qilish taqiqlandi
Afg‘oniston hukumati butun mamlakat bo‘ylab to‘ylar va bayram tadbirlarida mushaklar, petardalar hamda boshqa turdagi pirotexnika vositalaridan foydalanishni to‘liq taqiqladi, deb xabar bermoqda.
Bu boradagi buyruq 27-oktabr kuni Fazilatlarni targ‘ib qilish va yomonliklarning oldini olish vazirligi tomonidan e’lon qilindi.
Taqiq pirotexnika vositalarini ishlab chiqarish, import qilish, sotish, xarid qilish va tarqatishga ham tegishli.
Bu Afg‘oniston hukumatining pirotexnika vositalaridan foydalanishni cheklash bo‘yicha birinchi urinishi emas. Avvalroq mamlakatning ayrim shaharlarida, jumladan, Kobulda soat 21:00 dan 07:00 ga qadar petarda va mushaklarni uchirish taqiqlangandi.
Qoidabuzarlarga nisbatan mamlakat qonunchiligi hamda shariat me’yorlariga muvofiq choralar ko‘rilishi aytildi. Aniq jazo choralari esa ochiqlanmagan.
Vazirlik bu qarorni baland portlash tovushlari qo‘rquv va ruhiy stressni keltirib chiqarishi, bu esa ayniqsa bolalar, ayollar, keksalar hamda shifoxonalardagi bemorlarga og‘ir ta’sir qilishi bilan izohladi.