74 000 dan ortiq oʻzbekistonlik yoshlarga xalqaro imtihonlar uchun 151 milliard soʻm qoplab berildi
Oʻzbekistonda yuqori natijalarga erishgan 74 102 nafar yoshlarning xalqaro imtihon topshirish xarajatlari qoplab berildi, kompensatsiya toʻlovlarining umumiy miqdori 151 milliard soʻmga yetdi, deb maʼlum qildi Yoshlar ishlari agentligi rahbari Alisher Saʼdullayev.
74 000 dan ortiq oʻzbekistonlik yoshlarga xalqaro imtihonlar uchun 151 milliard soʻm qoplab berildi
Eng katta benefitsiarlar guruhini 18–23 yoshdagi yoshlar tashkil etdi — ularning 33 317 nafari kompensatsiya oldi. Yana 25 112 nafar benefitsiar 14–17 yoshdagilardir. Umumiy hisobda, 14–23 yoshdagilar barcha oluvchilarning 79 foizini tashkil etdi.
Dasturdan 38 503 nafar qiz va 35 599 nafar yigit foydalandi.
Eng koʻp kompensatsiya IELTS imtihoniga toʻgʻri keldi — 54 048 nafar yoshga imtihon toʻlovlarini qoplash uchun jami 125 milliard soʻm ajratildi. Yana 9 082 nafar yoshga SAT xarajatlari qoplab berildi.
Kompensatsiya dasturi koreys tili boʻyicha TOPIK, xitoy tili boʻyicha HSK, shuningdek, nemis tili boʻyicha TestDaF va Goethe-Zertifikat kabi xalqaro imtihonlarga ham taalluqlidir.
2025 yilda 17 261 nafar yoshning imtihon xarajatlari qoplandi. Hukumat 2026 yil oxirigacha bu koʻrsatkichni 25 850 nafarga yetkazishni rejalashtirmoqda.
Saʼdullayevning soʻzlariga koʻra, Prezident qaroriga muvofiq, belgilangan 12 ta hududda doimiy yashovchi yoshlar IELTS imtihonidan kamida 6 ball yoki TOEFL imtihonidan 60 va undan yuqori ball toʻplasa, imtihon xarajatlarini qoplab olishlari mumkin.
Qoraqalpogʻistonning shimoliy hududlarida kompensatsiya olish uchun IELTS’dan 6 ball olish kifoya qiladi.