2050 yilga borib Oʻzbekistonda yoshlar soni 15 million kishiga yetadi
2050 yilga borib Oʻzbekistonda yoshlar soni 15 mln kishiga yetadi
«Oila va gender» ilmiy-tadqiqot instituti uzoq muddatli demografik prognoz taqdim etdi, unga koʻra Oʻzbekistonda 14 yoshdan 30 yoshgacha boʻlgan aholi sonining sezilarli darajada oʻsishi kutilmoqda.
1996–2012 yillardagi past tugʻilish koʻrsatkichi bilan bogʻliq pasayishdan soʻng, yoshlar soni yana tez surʼatlar bilan koʻpaya boshlaydi.
Yoshlar (14–30 yosh) soni oʻsishining dinamikasi:
2021 yil: 9,68 mln kishi
2025 yil: 9,62 mln kishi (pasayish)
2030 yil: 10,41 mln kishi
2040 yil: 13,27 mln kishi
2050 yil: 14,92 mln kishi
Ekspertlarning taʼkidlashicha, 2026 yildan 2033 yilgacha boʻlgan davrda yoshlar soni oʻsib boradi, biroq ularning umumiy aholi sonidagi ulushi kamayishda davom etadi. Yoshlar ulushining umumiy aholiga nisbatan koʻpayishi faqat 2034 yildan boshlab kutilmoqda.
Demografik oʻzgarishlar yangi oilalar sonining koʻpayishiga olib keladi. Institut tahlilchilarining baholashicha, fuqarolarning nikoh yoshiga yetishi bilan hamyonbop uy-joylarga, qoʻllab-quvvatlash dasturlariga, ish oʻrinlariga, shuningdek, bolalar bogʻchalari, tibbiyot muassasalari va ijtimoiy himoya xizmatlariga boʻlgan ehtiyoj keskin ortadi.