2026 yilning sakkiz oyi yakunlariga koʻra Oʻzbekiston va Rossiya oʻrtasidagi tovar ayirboshlash hajmi 10 foizga oshdi
2026 yilning sakkiz oyi yakunlariga koʻra, Oʻzbekiston va Rossiya oʻrtasidagi tovar ayirboshlash hajmi 10 foizga oshdi. Bu haqda 6 oktyabr kuni Fargʻonada boʻlib oʻtgan Oʻzbekiston Respublikasi va Rossiya Federatsiyasi oʻrtasidagi iqtisodiy hamkorlik boʻyicha Hukumatlararo komissiyaning 27-yigʻilishida maʼlum qilindi.
Oʻzbekiston va Rossiya oʻrtasidagi tovar ayirboshlash hajmi 2026 yilning sakkiz oyi yakunlariga koʻra 10 foizga oshdi.
Yigʻilishda Oʻzbekiston delegatsiyasiga Bosh vazir oʻrinbosari Jamshid Xoʻjayev, Rossiya delegatsiyasiga esa RF Hukumati raisining birinchi oʻrinbosari Denis Manturov boshchilik qildi.
Yigʻilishni ochar ekan, Jamshid Xoʻjayev komissiyaning avvalgi yigʻilishidan soʻng Oʻzbekiston-Rossiya hamkorligi kun tartibi sezilarli darajada kengayganini, Hukumatlararo komissiya mexanizmining oʻzi esa ikki davlat rahbarlari kelishuvlarini amaliy roʻyobga chiqarishda muhim rol oʻynashini taʼkidladi.
«Vazifamiz — loyihalarning oʻz vaqtida bajarilishini taʼminlash va hamkorlikdagi harakatlarni talab qiladigan masalalar boʻyicha qarorlarni kelishib olishdir. Iqtisodiyotlarimiz bir-birini yaxshi toʻldiradi va bu savdo sherikligimizning asosiy ustunlaridan biridir», — deb qayd etdi Xoʻjayev.
Yigʻilish davomida qoʻshma loyihalarni amalga oshirish masalasi ham koʻrib chiqildi. 2026 yilda kimyo sanoati, qishloq xoʻjaligi mahsulotlarini qayta ishlash va metallga ishlov berish sohalarida umumiy qiymati 350 million dollarlik 17 ta qoʻshma loyihani ishga tushirish rejalashtirilgan.
Energetika sohasidagi hamkorlikka, jumladan, Jizzax viloyatida atom elektr stantsiyasi qurilishi, milliy kadrlarni tayyorlash hamda uskunalar va xizmatlarni mahalliylashtirish masalalariga alohida eʼtibor qaratildi.
Bundan tashqari, tomonlar turistik almashinuvlarning ijobiy dinamikasini qayd etdilar. 2025 yilda Oʻzbekistonga qariyb 1 million rossiyalik sayyoh tashrif buyurgan.
Yigʻilish yakunlari boʻyicha Hukumatlararo komissiyaning 27-yigʻilishi Bayonnomasi hamda Rossiya va Oʻzbekistonning 2026–2040 yillarga moʻljallangan ilmiy-texnologik rivojlanish strategiyasi imzolandi.
Tomonlar qoʻshma loyihalarni amaliy roʻyobga chiqarishni davom ettirish va Oʻzbekiston-Rossiya strategik sherikligini yanada mustahkamlashga tayyor ekanliklarini tasdiqladilar. 2027 yilda mamlakatlar diplomatik munosabatlar oʻrnatilganining 35 yilligini nishonlaydilar.