20 yoşli Antonelli «Formula-1» tarixidagi eng yoş çempion böldi
Mercedes jamoasining italiyalik poygaçisi Kimi Antonelli 20 yoşida «Formula-1» tarixidagi eng yoş jahon çempioniga aylandi. U Meksika Gran-prisida uçinçi örinni egallab, mavsum yakunlanişidan oldin çempionlikni taʼminladi.
20 yoshli Antonelli «Formula-1» tarixidagi eng yosh chempionga aylandi
1-noyabr kuni Mexikoda o‘tkazilgan poygadan so‘ng Antonellining umumiy hisobdagi ustunligi 119 ochkoga yetdi. Qolgan bosqichlarda raqiblari bu farqni yo‘qqa chiqara olmaydigan bo‘ldi.
Meksika Gran-prisida Red Bull poygachisi Maks Ferstappen g‘alaba qozondi. Poygani birinchi pozitsiyadan boshlagan Ferrari vakili Lyuis Hemilton esa undan ozgina ortda qolib, ikkinchi o‘rinni egalladi.
Antonelli chempionlikni qo‘lga kiritgan kuni 20 yosh-u 68 kunlik edi. Shu tariqa u germaniyalik Sebastyan Fettelning rekordini yangiladi. Fettel 2010-yilda birinchi chempionligini 23 yosh-u 134 kunligida qo‘lga kiritgan va shu paytgacha «Formula-1»ning eng yosh chempioni bo‘lib kelayotgandi.
Bolonyalik poygachi Italiya tarixida ushbu unvonga sazovor bo‘lgan uchinchi sportchiga ham aylandi. Undan avval Juzeppe Farina 1950-yilda, Alberto Askari esa 1952 va 1953-yillarda chempion bo‘lgan. Shu tariqa italiyalik poygachi 73 yildan keyin yana «Formula-1» chempioni bo‘ldi.
Antonelli 2024-yilda Mercedes jamoasida sinov piloti sifatida faoliyat yuritgan. 2025-yilgi mavsumda u uch marta sovrindorlar safidan joy olgan, biroq hech bir bosqichda g‘alaba qozonmagan. O‘sha mavsumni 150 ochko bilan yettinchi o‘rinda yakunlagan.
Joriy mavsumda esa uning natijalari keskin yaxshilandi. Antonelli Meksika Gran-prisiga qadar to‘qqizta poygada g‘alaba qozongan, uch martadan ikkinchi va uchinchi o‘rinlarni egallagandi.