100 yildan soʻng ismi oʻziga qaytarilgan Birinchi jahon urushi askari
Oʻlimidan 100 yildan koʻproq vaqt oʻtib topilgan uning xokiga toʻliq harbiy dafn marosimi oʻtkaziladi.
**100 yildan soʻng ismi oʻziga qaytarilgan Birinchi jahon urushi askari**
Mudofaa vazirligining harbiy detektivi Aleksiya Klark Menningning tirik qarindoshlarini topish ustida ishlamoqda
1915 yilda Ipsvichlik kapral Jorj Tomas Menning Birinchi jahon urushida halok boʻlgan edi, ammo uning jasadi topilishi uchun 100 yildan ortiq vaqt kerak boʻldi.
Saffolk polkining 2-bataloni askari Belgiyadagi janglarda halok boʻlgan, uning ayoli va ikki qizi u qayerda dafn etilganini bilmay vafot etgan.
2019 yilda Ipr yaqinidagi zovurdan inson qoldiqlari topildi va keyinchalik ular Menningga tegishli ekani tasdiqlandi. Mudofaa vazirligining ushbu ishni hal qilgan detektivi Aleksiya Klark shunday dedi: "Insonga oʻz ismini qaytarib berish har doim yoqimli tuygʻu".
Endilikda Belgiyada barcha harbiy ehtiromlar bilan dafn marosimi oʻtkazilishi rejalashtirilmoqda, Mudofaa vazirligi va Ipsvich urush memoriali Menningning avlodlari ishtirok etishlari uchun ularni qidirmoqda.
Menning 1881 yilda Ipsvichda tugʻilgan va oiladagi toʻqqiz farzanddan biri boʻlgan.
1905 yilda u Florens Elizabet Beylsga uylangan va yer-xotinning ikki qizi boʻlgan.
1914 yilda urush boshlanganida, Menning keyingi yili Belgiyaning Ipr yaqinidagi Kemmel shahrida jang qilayotgan edi.
Askarlar merganlar oʻqi va artilleriya zarbalariga duch kelishdi va 140 ta odam halok boʻldi, jumladan, 1915 yil 9 martda 34 yoshida vafot etgan Menning ham.
Iprdagi Menin darvozasi ushbu hududda halok boʻlgan va maʼlum qabri boʻlmagan 55 000 nafar britan va Hamdoʻstlik askarlari xotirasini yod etadi.
Mudofaa vazirligi harbiy detektivi Aleksiya Klarkning aytishicha, qoldiqlar 2019 yilda Kemmelda zovurni tozalash ishlari paytida topilgan.
Ular qazib olingan va Hamdoʻstlik urush qabrlari komissiyasi tomonidan Frantsiyadagi oʻlikxonaga olib ketilgan.
2024 yilda Mudofaa vazirligi jasad bilan birga topilgan ashyolar orasida Saffolk belgisi boʻlgan ikkita jez nishon borligi haqida hisobot oldi.
Mudofaa vazirligi Belgiyaning ushbu qismida faqat Saffolk polkining 2-bataloni boʻlgani va halok boʻlgan askarlarning 26 nafari hali ham bedarak yoʻqolgan deb hisoblanishi haqida xulosaga keldi.
Klark tirik qarindoshlarini topish va qoldiqlarga mos kelishini tekshirish uchun ulardan DNK namunasini soʻrash maqsadida bedarak yoʻqolgan askarlarning shajara daraxtini tuzishni boshladi.
Klark shunday dedi: "Men ushbu aniq odam Jorj Tomas Menning ekanini isbotlash va moslikni topishga erishishdan oldin boshqa olti kishining shajarasini oʻrganib chiqdim.
"DNK pudratchilaridan hisobot kelib, 'Ha, bu safar topdingiz' deyilganida, bu juda hayajonli tuygʻu.
"Ayniqsa, sizda oʻrganilishi va sonini kamaytirish kerak boʻlgan juda koʻp talofatlar boʻlishi mumkin boʻlgan vaziyatda."
Menningga mos kelgan shaxs uning evarasi (aka-uka yoki opa-singlisining evarasi) boʻlib chiqdi. Shunga koʻra yana ikki qarindoshi aniqlandi, jumladan, biri Avstraliyada.
Menningning qizlarining oʻz farzandlari boʻlmagan deb hisoblanadi. Biroq, u toʻqqiz farzanddan biri boʻlgani sababli, Klark hali ham tirik boʻlgan qarindoshlari koʻp boʻlishini kutgan edi.
Ipsvich urush memorialidan Endryu Bil guruh Menning oilasiga xotirjamlik berishga yordam berishi mumkinligiga umid qilishini aytdi.
Mudofaa vazirligi Ipsvich urush memorialidan Saffolkda boʻlishi mumkin boʻlgan boshqa qarindoshlarni topishda yordam soʻradi.
Guruhdan Endryu Bil ular taxminan 10 yil oldin Menningni tadqiq qilishganini va uning qarindoshlariga nihoyat xotirjamlik berilishi "ajoyib" ekanini aytdi.
U shunday dedi: "Urushdan keyin [Menningning oilasi uchun] hech qanday qabr yoʻqligini va uni topa olmasliklarini anglash juda alamli boʻlgandir.
"Yillar davomida biz oilalardan kelgan xatlar va boshqa narsalarga duch keldik va ular tashrif buyuradigan qabr yoʻqligidan juda qaygʻuda.
"Shunchaki devordagi lavha bor, xolos – bu aslida bir xil narsa emas."
Menning uchun toʻliq harbiy dafn marosimi kelasi bahorda Belgiyada boʻlib oʻtadi va uning qoldiqlari Saffolk polkining boshqa aʼzolari yoniga qabristonga dafn etiladi.
Oʻzini Menningga qarindosh deb hisoblagan har bir kishidan Mudofaa vazirligi bilan bogʻlanish soʻraladi.