Zelenskiy ilk bor Serbiyaga tashrif bilan keldi
Ukraina prezidenti Volodimir Zelenskiy Rossiya–Ukraina urushi boshlanganidan buyon ilk marta Serbiyaga tashrif buyurdi. Belgradda u Serbiya prezidenti Aleksandr Vuchich bilan norasmiy uchrashuv o‘tkazdi. Tomonlar 8-avgust kuni rasmiy muzokaralar o‘tkazib, iqtisodiy hamkorlik, xavfsizlik va Yevropa Ittifoqi bilan munosabatlarga oid masalalarni muhokama qilishi rejalashtirilgan.
Zelenskiy ilk bor Serbiyaga tashrif buyurdi
Ukraina Prezidenti Volodimir Zelenskiy 7-avgust oqshomida Belgradda Serbiya Prezidenti Aleksandr Vuchich bilan kechki ovqatda uchrashdi. Bu 2022-yilda Rossiyaning keng ko‘lamli bosqini boshlanganidan beri Ukraina rahbarining Serbiyaga birinchi tashrifi hisoblanadi.
Uchrashuvdan so‘ng Zelenskiy ijtimoiy tarmoqda qisqacha izoh qoldirib, "Serbiyada ikki tomonlama muloqotni boshladik", deb yozdi. Uchrashuv mazmuni yoki erishilgan natijalar haqida qo‘shimcha ma’lumot berilmadi.
Aleksandr Vuchich esa tashrif ikki mamlakat o‘rtasidagi munosabatlarni yanada rivojlantirish va o‘zaro manfaatli sohalarda hamkorlikni mustahkamlashga xizmat qilishini ta’kidladi. Uning so‘zlariga ko‘ra, muzokaralarda iqtisodiy aloqalarni kengaytirish, energetika sohasidagi hamkorlik, xavfsizlik va Yevropa Ittifoqi bilan munosabatlar masalalari muhokama qilinadi.
Serbiya Prezidenti matbuot xizmatining ma’lumotiga ko‘ra, davlat rahbarlarining rasmiy muzokaralari 8-avgust kuni Belgraddagi Prezident saroyida bo‘lib o‘tadi. Uchrashuv yakunida ikki prezident ommaviy axborot vositalari vakillari uchun qo‘shma matbuot anjumani o‘tkazishi rejalashtirilgan. Shuningdek, Zelenskiy tashrif davomida Serbiya Bosh vaziri Juro Matsut bilan ham uchrashadi.
Serbiya Yevropa mamlakatlari orasida Rossiya bilan eng yaqin munosabatlarni saqlab qolayotgan davlatlardan biri hisoblanadi. Belgrad 2022-yilda urush boshlanganidan keyin Moskvaga qarshi sanksiyalar joriy etmagan va energetika sohasida Rossiya bilan hamkorlikni davom ettirmoqda. Shu bois Yevropa Ittifoqi Serbiyaning Rossiya bilan yaqin aloqalari mamlakatning YeIga a’zo bo‘lish jarayoniga salbiy ta’sir ko‘rsatayotganini bir necha bor ta’kidlagan.
Prezident Aleksandr Vuchich 2022-yildan buyon kamida ikki marta Rossiya Prezidenti Vladimir Putin bilan shaxsan uchrashgan. Xususan, u 2025-yil 9-may kuni Moskvada bo‘lib o‘tgan G‘alaba paradida ishtirok etgan edi.
Zelenskiy va Vuchich esa 2022-yil 24-fevraldan keyin uch marta shaxsan uchrashgan. Ular 2023-yilda Kishinyov va Afinada, 2025-yilda esa Odessada o‘tgan "Ukraina – Janubi-Sharqiy Yevropa" sammiti doirasida muzokaralar o‘tkazgan.
AFP agentligining yuqori lavozimli ukrainalik manbasiga ko‘ra, Zelenskiyning Belgradga tashrifi Rossiya uchun muhim siyosiy signal sifatida baholanmoqda.